Qurlyqtyq hokkeı lıgasynyń (QHL) kezekti týr oıynyn Máskeýde ótkizgen Nur-Sultannyń "Barysy" jergilikti SSKA klýbyna ese jiberdi, dep habarlaıdy Egemen.kz.
Mınskidegi sátsizdikten soń qazaqstandyq komandanyń bapkerleri quramaǵa biraz ózgeris engizgen edi. Alaıda odan da ońdy nátıje shyqpady. Báseke bastalǵan bette oıyn tizginin qolǵa alǵan SSKA-nyń saıypqyrandary qaqpamyzǵa qatarynan eki shaıba soqty.
Bul goldardyń avtorlary – Maksım Mamın (8 mınýt) men Andreı Svetlakov (11 mınýt). Úziliske deıin "Barys" esep aıyrmashylyǵyn qysqartty. 17 mınýtta Nıkıta Mıhaılıs qarsylastar qaqpasynan sańlaý tapty. Ekinshi kezeńniń sońynda qonaqtardyń eki birdeı oıynshysy muz aıdynynan qýyldy. Bul jaǵdaıda jergilikti hokkeıshiler utymdy paıdalandy. 37 mınýtte Anton Slepyshev mergendik tanytty – 3:1. Odan keıin qos ujym qansha jantalasqanymen, tablodaǵy esep ózgergen joq.
10 qyrkúıekte "Barys" Qytaıdyń "Kýnlýn" klýbyn qabyldaıdy. Qos birdeı sátsizdikten jerlesterimiz tıisti qorytyndy shyǵaryp, bul joly óz jankúıerlerin qýantady dep úmittenemiz.