Almatyda "Azamattardyń áleýmettik osal sanattaryna jáne múmkindigi shekteýli jandarǵa tegin zańgerlik keńes berý" qaıyrymdylyq aksııasy óz jalǵasyn tabýda, dep habarlaıdy Egemen.kz
"Qoǵamnyń san-salaly ómirinde adam quqyqtaryn, zańdy múdelerin qorǵaý, qalpyna keltirýdi barynsha qamtıtyn sala – zań salasy, quqyq, quqyqtyq qatynastar. Onyń basynda – Konstıtýsııamyz tur. Egemen elimizdiń quqyqtyq memleketke baǵyt alǵandyǵynan azamattardyń quqyqtyq saýatty bolýy barǵan saıyn pármendi jaǵdaıǵa aınalýda. Azamattardy quqyqtyq jaǵynan qoldaý, quqyqtyq kómek kórsetý maqsatymen Abaı atyndaǵy QazUPÝ rektory, Almaty qalasy, Medeý aýdandyq Nur Otan fılıalyna qarasty "Abaı" bastaýysh partııa uıymynyń tóraǵasy Takır Balyqbaevtyń bastamasymen qaıyrymdylyq aksııasy uıymdastyryldy", dep atap ótti Abaı atyndaǵy QazUPÝ professory Gúljazıra Meıirbekova.
Qaıyrymdylyq aksııasy kezinde kafedra meńgerýshisi zań ǵylymdarynyń doktory, professor Ermek Býrıbaev basshylyǵymen qazaqstandyq eńbekti qorǵaý, áleýmettik qamsyzdandyrý, bala men anany qorǵaý boıynsha zań jobalaryna usynys berip, damýyna úles qosyp júrgen zań ǵylymdarynyń doktory, professor Janna Hamzına, táýelsiz elimizdiń eńbek quqyǵynyń irgetasyn qalaýshy, ýnıversıtet zańgeri Daýlet Rysqalıev, zań ǵylymdarynyń doktory, qaýymdastyrylǵan professor Aıgúl Bıjanova, zań ǵylymdarynyń kandıdaty, qaýymdastyrylǵan professor Baqytqalı Kóshpenbetov, ýnıversıtet dosenti, advokat zańger Gúljazıra Meıirbekova, quqyq magıstri Dınara Belhojaeva, quqyq magıstri Janar Moldahmetova qatysýymen, 80-dan asa áleýmettik osal sanattaryna jatatyn azamattarǵa jan-jaqty, tııanaqty, negizdi quqyqtyq keńester berildi. Quqyqtyq kómek alǵan azamattardyń aty-jóni tirkelip, kafedra boıynsha esep berildi. Onyń ishinde jartysynan astam azamattar aldyn ala jazylý arqyly keńes alsa, qalǵany Qaraǵandy, Pavlodar, Atyraý, Shymkent qalalarynyń turǵyndary tikeleı telefon arqyly habarlasyp, áleýmettik kómek, múgedektigi boıynsha taǵaıyndalatyn járdemaqy týraly, turǵyn úı máselesi boıynsha jańa baǵdarlamalar jóninde quqyqtyq keńester aldy.
"Qaıyr qylsań – bútin qyl" demekshi, bolashaqta "Quqyqtaný" kafedrasynyń bilikti mamandary tegin quqyqtyq kómek berý sharalaryn ári qaraı jalǵastyratyn bolady.