Elordadaǵy Tótenshe jaǵdaılar departamenti terezelerdi ashyq qaldyrmaýǵa, balalardy tereze aldyna shyǵarmaýǵa, sondaı-aq múmkindiginshe shekteý ornatýǵa keńes beredi, dep habarlaıdy Egemen.kz ákimdiktiń baspasóz qyzmetine silteme jasap.
Nur-Sultan qalasy Tótenshe jaǵdaılar departamenti basqarmasynyń basshysy Erkin Otarǵalymuly brıfıngte balalardyń qaýipsizdigin muqııat baqylaýǵa shaqyrdy. Sýdaǵy oqıǵalar men órt qaýpi sııaqty faktorlarmen qatar, úılerdegi ashyq terezeler de balaǵa qaýip tóndiredi. 2018 jyldan bastap elordada terezeden qulaý saldarynan 70 bala zardap shekti. Osy jyldyń basynan beri osyndaı 28 jaǵdaı tirkelgen.
"2 jastan 7 jasqa deıingi balalardyń terezeden qulaýy óte jıi kezdesedi. Bul jyl saıyn qaıtalanyp keledi. Balalardyń qulaýynyń negizgi sebebi - olardy ashyq tereze janynda qaraýsyz qaldyrý. Bala óz qyzyǵýshylyǵyna baılanysty úıde qaraýsyz qalyp, aýlada balalardyń oınap júrgenin estıdi jáne terezege qaraı umtylady", dep atap ótti Erkin Otarǵalymuly.
Tótenshe jaǵdaılar departamenti balalardyń terezeden qulaý qaýpin azaıtý úshin, ata-analarǵa erejeler ázirledi. TJD balalardy ashyq tereze janynda qaraýsyz qaldyrmaýǵa keńes beredi. Bala terezege kóterile almaıtyndaı etip jıhaz qoıý kerek. Masalardyń tory qulaýdan qorǵamaıtynyn este ustaǵan jón. Balany arnaıy shektegishter men bekitkishter ǵana qorǵaı alady. Sonymen qatar, balalarmen áńgimelesý jáne terezede oıynaý óte qaýipti ekenin túsindirý mańyzdy.Kóp qabatty úılerde bıiktikten eresekter de qulaıdy. 2020 jyldyń basynan beri elordada osyndaı 14 jaǵdaı tirkelgen. Qaıǵyly oqıǵalardyń biri - 14 qyrkúıekte parapet arqyly páterine kirgisi kelgen turǵyn boldy, biraq altynshy qabattan qulady. Alǵan jaraqattarynyń nátıjesinde ol qaıtys bolǵan.
TJD qalada tótenshe jaǵdaılardyń aldyn alý boıynsha mindetterdi oryndaýǵa daıyn azamattyq qorǵaý qyzmeti táýligine 24 saǵat boıy jumys isteıtinin eske salady.
Qıyn jaǵdaıda elordalyqtar 101 nemese 112 nómirleri boıynsha kómek suraı alady.