Álem jáne Batys Eýropa mádenıeti men ádebıetindegi eń ataqty shyǵarmalardyń biri "Charlı jáne shokolad fabrıkasy" ertegi povesi qazaqshaǵa aýdaryldy. Shyǵarma avtory – áıgili jazýshy, aqyn, ssenarıst Rýal Dahl (Roald Dahl). Kitapty Qazaqstanda Steppe & WORLD Publishing baspasy shyǵardy, dep habarlaıdy Egemen.kz
Baspa basshysy Raısa Qadirdiń aıtýynsha, 13 qyrkúıekte álem boıynsha Dahl kúni atalyp ótedi eken. Sondyqtan qazaq tilindegi "Charlı jáne shokolad fabrıkasy" osy merekege oraılastyryp jaryq kórigen.
"Charlı jáne shokolad fabrıkasyn» dúnıedegi eń tátti týyndy dep aıtar edim. Oqyp otyrǵanda shokolad dámin sezdirip, til úıiretin shyǵarma. Bul – qazaq tilinde alǵash ret Dahl áýletiniń jáne ataqty ıllıýstrator Kúentın Bleıktiń resmı ruqsatymen shyǵyp jatqan basylym", deıdi Raısa Qadir.
Ol Rýal Dahl men Kúentın Bleıktiń óneri birikkende, keremet sımbıoz paıda bolǵanyn aıtady.
"Charlı jáne shokolad fabrıkasyn" qazaq tiline leksıkograf, aǵylshyn tili pániniń oqytýshysy Úrıla Keńesbaeva aýdarǵan. Al redaktory – Nazgúl Qojabek.
"Kitap óte qarapaıym aǵylshyn tilinde jazylǵanyn atap ótken durys. Zertteýshiler avtordyń qoldanǵan sózi eki myńnyń ar jaq-ber jaǵynda degendi aıtady. Qazaqsha nusqasy da tili jeńil, uǵynyqty bolyp shyqty. Bul aýdarmashy men redaktorymyzdyń joǵary deńgeıdegi maman ekenin dáleldeıdi", deıdi Raısa Qadir.
Baspa basshysy kitaptyń balalarǵa arnalyp jazylǵanyna qaramastan, oqyrmandardyń kóbi eresek adam ekenin aıtady. Oǵan kitapta órbigen oqıǵanyń qyzyqtyryp, elitip áketýimen qatar, úlken oı salady.
"Charlı jáne shokolad fabrıkasy" kitabyna Steppe & WORLD Publishing baspasynyń áleýmettik jelilerdegi paraqshalary (Facebook, Instagram) arqyly, sondaı-aq whatsapp messendjerimen +7 700 246 35 30 nómiri boıynsha tapsyrys berýge bolady.