Almaty oblysynda jylytý maýsymy bastalmas buryn Qarasaı jáne Talǵar aýdandarynda 1000-nan astam abonentteri bar 23 kóppáterli turǵyn úılerdi ortalyq jylytýǵa qosýǵa múmkindik beretin 14 bloktyq-modýldik qazandyqtardyń qurylysyn aıaqtaý josparlanýda, dep habarlaıdy Egemen.kz Almaty oblysy ákiminiń baspasóz qyzmetine silteme jasap.
Oblystyq energetıka jáne turǵyn úı-kommýnaldyq sharýashylyq basqarmasynyń málimetinshe, Qarasaı óńirinde jalpy quny 983 mıllıon teńgeni quraıtyn 3 blok-modýldi qazandyq (BMQ) ornatylady. Nátıjesinde 409 abonenti bar 10 kóppáterli turǵyn úı ortalyq jylytýǵa qosylady. Joba «Jumyspen qamtýdyń jol kartasy» baǵdarlamasy aıasynda júzege asyrylýda. Sondaı-aq Talǵar aýdanynda 11 BMQ qurylysy úshin «Gorizont KZ» JShS-men 850 mıllıon teńge somasynda ınvestısııalyq kelisimshart jasaldy. Ol 632 abonenti bar 13 kóppáterli turǵyn úıdi jylytýǵa qosylady.
Jalpy, 2019 jyldyń sońynda Talǵar aýdanynda 129 kóppáterli turǵyn úıge 21 BMQ ornatyldy. Nátıjesinde 3857 abonent sapaly jylýmen qamtamasyz etildi.
Bıyl Qaratal, Qarasaı, Eńbekshiqazaq jáne Panfılov aýdandarynda 33 BMQ ornatý arqyly 108 kóppáterli turǵyn úı ortalyqtandyrylǵan jylytýǵa qosýdyń jobalyq-smetalyq qujaty ázirlendi. 2021 jyly Eńbekshiqazaq, Qarasaı, Uıǵyr, Kóksý jáne Ile aýdandarynda 254,3 mıllıon teńge somasyna 106 kóppáterli turǵyn úı qamtylǵan 17 BMQ ornatý úshin qosymsha jobalyq-smetalyq qujattama ázirleý josparlanýda.
Talǵar aýdanyna qarasty «Melıorator» jáne «Boztorǵaı» shaǵyn aýdandardyń turǵyndary kópqabatty úılerdi ortalyq jylytýǵa qosý máselesin aımaq basshysyna joldaǵan bolatyn. Modýldik qazandyqtardy ornatý jumystary oblys ákiminiń tapsyrmasy boıynsha atalǵan shaǵyn aýdandarda júıeli túrde atqarylýda. Dál osy aýdan turǵyndary oblystyń barlyq aýdany men qalasyn birtindep qamtıtyn jumystardyń nátıjelerin alǵashqylardyń biri bolyp joǵary baǵalady.
Oblys ákimi Amandyq Batalov atap ótkendeı, kóppáterli turǵyn úılerdi ortalyqtandyrylǵan jylýmen jabdyqtaýǵa qosý – halyqtyń ómir súrý deńgeıin kóterý úshin atqarylatyn jumystyń biri. Demek, bul jumys qoıylǵan mindetterdi zor jaýapkershilikpen jáne sapaly oryndaýdy talap etedi.
Aıta ketý kerek, oblysta barlyǵy 3581 kóppáterli turǵyn úı bar. Onyń 366-synda jeke jylý bar. 2018 jyldan bastap bekitilgen kestege sáıkes ortalyq gazben jylytýǵa kóshirý jumystary júrgizilýde.