Taıqazannyń Túrkistan qalasyna qaıta oralǵan kúnine oraı, "Áziret Sultan" memlekettik tarıhı-mádenı qoryq-mýzeıiniń uıymdastyrýymen, "Bereke, birliktiń sımvoly – Taıqazan" kórmesi ashyldy, dep habarlaıdy Egemen.kz
Kıeli Taıqazan memleket jáne qoǵam qaıratkeri О́zbekáli Jánibekovtiń bastamasymen 1989 jyly 18 qyrkúıek kúni Qoja Ahmet Iаsaýı kesenesine jetkizilgen bolatyn. Osy kúni Qoja Ahmet Iаsaýı kesenesinde tarıhı jádiger jaıly kórme uıymdastyrý dástúrge aınalǵan. «Kórmeniń maqsaty – kıeli Taıqazannyń jasalý, tarıhı ornyna oralý jáne jasaǵan ustanyń esimi men jasalǵan ornynyń tarıhymen tanystyrý, tól tarıhymyzdy nasıhattaý. Sondaı-aq, Elbasy N.Nazarbaevtyń "Bolashaqqa baǵdar: rýhanı jańǵyrý" jáne "Uly Dalanyń jeti qyry" baǵdarlamalyq maqalalarynda kórsetilgen baǵyttaryn júzege asyrý máselelerin de qamtıdy. Bıylǵy sharanyń ereksheligi Taıqazan kóshirmesin jasap júrgen tanymal qolóner sheberleriniń de jumystary tanystyrylýda», deıdi "Áziret Sultan" memlekettik tarıhı-mádenı qoryq-mýzeıiniń dırektory Nurbolat Ahmetjanov.
Kórme jádigerleri arasyndaǵy aǵashtan jasalǵan alyp Taıqazan kelýshilerdi qyzyqtyrýda. Kóshirme avtorlary – Shymkent qalasyndaǵy №90 daryndy balalarǵa arnalǵan mamandandyrylǵan mektep-gımnazııasynyń ustazdary Qydyrǵalı Agıbaev, Perdehan Tansıhov jáne Bolat Serikbekov. Taıqazannyń jeti túrli metaldan jasalǵany belgili. Qolóner sheberleri de soǵan negizdep jeti túrli aǵashty qoldanypty. Iаǵnı AQSh, Ońtústik Koreıa, Reseı, О́zbekstan, Qyrǵyzstan jáne elimizdiń sapaly aǵashtarynan jasalǵan. Kóshirmeni jasap shyǵýǵa bir jarym jyldaı ýaqyt jumsaǵan ustazdar múmkin bolǵansha negizgi nusqasyna keltirýge tyrysqandaryn aıtadyq.
"Salmaǵy 300 kelige jýyqtaıdy. Túpnusqa Taıqazannyń oıý-órnekteri men ózge de elementterin dál túsirip, jazýlarynan qatelik jibermeý úshin arnaıy mamandardyń kómegine júgindik. Taıqazandy oqýshylarǵa aǵash joný, kesý, jelimdeý syndy jumystardy úırete otyryp jasadyq. Shákirtterimiz úshin bul jumys eń erekshe tájirıbe boldy dep oılaımyz", deıdi aǵash sheberi, ustaz Qydyrǵalı Agıbaev.
Kórmege Taıqazannyń quıylǵan orny men 1935 jyly Lenıngrad (Sankt-Peterbýrg) qalasyndaǵy Iran sheberleriniń III Halyqaralyq konferensııasyna alyp ketken jáne qaıta oralǵan sátterinen sýretter, jádigerdiń qaıta oralýyna baılanysty tarıhı qujattar, kitaptar, mýzeı, qala ákimshilikteriniń Úkimetke, Joǵarǵy keńeske, Halyq depýtattaryna jazǵan hattary men jedelhattarynyń kóshirmeleri, qolóner sheberleri jasaǵan Taıqazan kóshirmeleri jáne ár jyldary syıǵa tartylǵan mýzeı qorynda saqtalǵan jádigerler qoıylǵan. Karantın talaptaryna sáıkes kórmege kelýshilerdiń saqtyq sharalary saqtalǵan. Kórme bir aı boıy Qoja Ahmet Iаsaýı kesenesine kelýshilerdiń nazaryna usynylady.
Túrkistan oblysy