Parlament Senatynyń depýtaty Aqmaral Álnazarova DDU-nyń Qazaqstandaǵy eldik keńsesiniń basshysy doktor Karolın Klarınvalmen kezdesti, dep habarlaıdy Egemen.kz Senattyń baspasóz qyzmetine silteme jasap.
Taraptar COVID-19-ǵa qarsy kúres máselelerin, onyń ishinde Qazaqstandaǵy aǵymdaǵy jaǵdaıdy, sonymen qatar Aral óńirindegi halyqtyń densaýlyǵyn qorǵaý máselelerin talqylady.
Senator Aqmaral Álnazarova Dúnıejúzilik densaýlyq saqtaý uıymynyń Qazaqstanǵa Covid-19 pandemııasymen kúreste kórsetken jan-jaqty qoldaýy men yntymaqtastyǵy úshin DDU-nyń resmı ókiline alǵys aıtty.
"DDU bılik organdarynyń mańyzdy seriktesi bolyp keledi, óıtkeni uıym COVID-19-ǵa jaýap retinde tehnıkalyq usynystar ázirleıdi, ózge de tehnıkalyq bilikti resýrstaryn usynady. Bizdi halyq densaýlyǵyn saqtaý men zań shyǵarý máselelerindegi ózara yntymaqtastyǵymyz qýantady", - dep atap ótti Senat depýtaty.
Doktor Klarınval, óz kezeginde, DDU Qazaqstannyń COVID-19-ǵa qarsy kúrestegi kúsh-jigerin, sondaı-aq pandemııamen kúrestiń aldyńǵy shebinde júrgen qazaqstandyq medısına qyzmetkerleriniń kásibıligi men jankeshtiligin joǵary baǵalaıtynyn jetkizdi. Sondaı-aq, ol DDU Qazaqstanǵa epıdemıologııa, qaýip-qater kommýnıkasııasy, logıstıka jáne ózge de densaýlyq saqtaý baǵyttarynda qoldaý kórsetýdi jalǵastyratynyn aıtty.
"Yntymaqtastyq, ózara is-qımyl, bilim jáne resýrstar almasý neǵurlym tez áreket etý úshin asa mańyzdy, sondyqtan halyqtyń densaýlyǵyn qorǵaý jolynda barlyq taraptar arasynda syndarly dıalog qura otyryp, bir baǵytta júrýdi jalǵastyrý mańyzdy", dep túıindedi DDU-nyń Qazaqstandaǵy eldik keńsesiniń basshysy.