Bul oqıǵa tamyz aıynda bolǵan. Jaqynda Atyraý qalalyq ákimshilik sotynda ÝG-157/9 mekemesiniń aýlasyna mobıldi telefon, modem men sım-karta laqtyrǵan qala turǵynyna qatysty is qaraldy, dep habarlaıdy Egemen.kz.
“11 tamyzda túngi saǵat 3:00 shamasynda mekemeniń qaraýyly skotchqa oralǵan túıinshektiń mekeme aýlasyna laqtyrylǵanyn habarlap, Atyraý qalalyq polısııa basqarmasynyń jedel-tergeý toby shaqyryldy. Aıǵaq zattardy qaraý kezinde 4 “Samsung” mobıldi telefony, qýattaǵysh qurylǵy, sım-kartalar men 2 modem tabyldy. Mobıldi telefonda qala turǵynyń sýretteri saqtalǵany anyqtaldy. Túngi ýaqytta jasyrynyp, zattardyń túsken jerine kelgen jazasyn óteýshiniń biri ustaldy” dep habarlady Atyraý oblysy boıynsha Qylmystyq-atqarý júıesi departamentiniń baspasóz qyzmeti.
Túrmede jazasyn óteýshi zańsyz “sálemdemeni” laqtyrǵan azamattyń aty-jónin aıtpaǵan. Biraq mamyr aıynda “kýrer” men “tapsyrys berýshiniń” qysqa merzimdi kezdesýi bolǵany anyqtaldy. Departamenttiń polısııa qyzmetkerlerimen birlesken jumysynyń nátıjesinde zattardy laqtyryp, quqyq buzýshylyq jasaǵan azamat ustaldy.
Atyraý qalalyq ákimshilik sotynyń qaýlysymen “sálemdeme” laqtyrǵan 25 jastaǵy qala turǵynyna ákimshilik jaza, al, ÝG-157/9 mekemesiniń ákimshiligi “sálemdemege” tapsyrys berip, qabyldamaq bolǵan jazasyn óteýshige tártiptik jaza qoldanyldy.