Keshe «Qazmedıa» ortalyǵynda Májilis depýtaty Aıgúl Soloveva jýrnalıstermen brıfıng ótkizip, biraz máseleniń mánin ashyp bermek boldy. Olardy kóziqaraqty oqyrman ózi salmaqtar degen oımen aıtqandaryn birshama tutas bergendi jón kórdik.
Keshe «Qazmedıa» ortalyǵynda Májilis depýtaty Aıgúl Soloveva jýrnalıstermen brıfıng ótkizip, biraz máseleniń mánin ashyp bermek boldy. Olardy kóziqaraqty oqyrman ózi salmaqtar degen oımen aıtqandaryn birshama tutas bergendi jón kórdik.
Birinshi kezekte aıtarym, Elbasynyń atalǵan otyrysta sóılegen sózinen keıin men elimizdiń tórt aımaǵynda bolyp qaıttym. Prezıdenttiń barlyq sózderi turǵyndar tarapynan qoldaý tapqanyn kózimmen kórdim. Osyǵan baılanysty men Úkimettiń keıbir máselelerde áli kúnge nege sylbyrlyqqa jol berip otyrǵanyna toqtalǵym keledi. Úkimettiń óz jumysynda basshylyqqa alyp, jumys isteıtin qujattary – Elbasynyń «Qazaqstan- 2050» Strategııasy men «Nur Otan» partııasynyń Doktrınasy. Strategııada alǵa qoıylǵan eń mańyzdy mindet – básekelestikke qabiletti 30 damyǵan eldiń qataryna ený. Osy qujatty basshylyqqa alyp, Úkimet joǵary damyǵan elderden qalmaı jumys isteýi kerek. Ekinshiden, aımaqtardaǵy bizdiń saılaýshylarymyz da Úkimettiń jumysy shıraq bolyp, alǵa qoıylǵan mindetterdi tolyǵymen atqarǵanyn qalaıdy. Traektorııa belgilengennen keıin Úkimet osy mindetterdiń aıasynda óziniń reformalaryn iske asyrýy kerek edi. Alaıda, osy eki qujatty iske asyrýǵa baılanysty Úkimettiń naqty jumys nobaıyn kóre almaı otyrmyz. Osyǵan baılanysty men, sózim jalań bolmas úshin, bizdiń azamattarymyzdyń bárin tolǵandyryp júrgen keıbir problemalarǵa toqtala ketkim keldi. Birinshi kezekte, qoljetimdi turǵyn úı qurylysy jáne turǵyn úı-kommýnaldyq sharýashylyǵyn jańǵyrtý júıesi týraly aıtsam deımin. Bárińiz bilesizder, qoljetimdi turǵyn úı máselesi boıynsha toǵyz túrli tetik usynyldy. Alaıda, osy tetikterdiń biri de orta dáýletti turǵyndar úshin eshqandaı kedergisiz turǵyn úıge qol jetkizýine múmkinshilik beretin bazalyq negiz bola almady. Al basqa elderde mundaıǵa kez kelgen azamat qol jetkize alar edi. Sondyqtan, osy salada Úkimet qosymsha sharalar men tetikter qoldanýy kerek.
Ekinshiden, qurylys salasyna qatysy bar mınıstrlikter Parlamentke endi ǵana qurylys erejeleri men normalaryna ózgerister engizý jónindegi zań jobalaryn engizip jatyr. Onda qosymsha bıýdjet qarajattaryn bólý arqyly osy tetikterdi jetildirý ǵana qarastyrylǵan. Ekinshi jaǵynan alǵanda, keńeıtilgen otyrysta alǵa qoıylǵan mindetterdi tıimdi atqarýǵa tıisti baǵdarlamalar ázirlenbegen.
Úshinshiden, Turǵyn úı-kommýnaldyq sharýashylyǵyn jańǵyrtý baǵdarlamasy qabyldanyp, bıýdjetten qarajat bóldirý suralǵanda onyń osy taraptaǵy máseleni sheshýge arnalǵan eń jetildirilgen shara ekendigi týraly kóp aıtyldy. Biraq is júzinde ol da durys júrgizilmegenine bárińiz de kýásizder. Endi bıýdjetten bul baǵdarlamaǵa qarajat bólinbeıtin boldy, dedi depýtat.
Osy arada Aıgúl Saǵadıbekqyzy turǵyndarmen kezdesý kezinde osy máseleniń kóp kóteriletinin jetkizdi. Sonymen birge, olardyń turǵyn úı-kommýnaldyq sharýashylyǵyn jańǵyrtý boıynsha aıtqan usynystary týraly uzaq áńgimeledi. Baǵdarlamada bıýrokrattyq kedergilerdiń kóp bolǵandyǵy týraly da aıtyldy. Odan ári sheshen basqa baǵdarlamalar týraly da sóz qozǵap, keıbiriniń ózgerip ketetindigi mınıstrlikterdiń arasynda ózara kelisimniń joǵynda ekenin synap ótti. Máselen, dedi ol, Ekonomıka jáne bıýdjetti josparlaý mınıstrligi 18 mlrd. teńge bólindi dese, ol týraly basqa túgil aımaqtardaǵy departament dırektorlary da bilmeı qalady. Sondyqtan bul iste barynsha ashyqtyq, móldirlik kerek. Sonda sybaılas jemqorlyqqa da jol berilmeıdi.
Osydan ári ol sybaılas jemqorlyq problemalaryna aýysyp, Qaraǵandy men Qyzylordada Memlekettik sáýlet-qurylys baqylaý qyzmeti ókilderiniń sybaılas jemqorlyq qylmyspen ustalǵanyn kóldeneń tartty jáne osyndaılarǵa qarsy belsendi, naqty tetikterdiń joqtyǵyn synap ótti. Odan ári Úkimettiń turǵyn úı qurylysyn sapaly júrgizýge baılanysty baqylaýynyń tómendigin atap kórsetti. Osy baǵyttaǵy jumystardy, ókinishke qaraı, biz kóre almaı kelemiz, dedi ol.
Degenmen, depýtat Aıgúl Solovevanyń Úkimet tarapyna aıtqan syndary barynsha naqty máselelerdi qamtyǵan syn turǵysynda bolmaı shyqqandaı kórindi. Ol bir máseleden bir máselege aýysyp, oıyn júıeli túrde jetkize almaǵandaı áser qaldyrdy. Osynyń ózinen onyń aýdıtorııanyń aldyna daıyndyqsyz kelgeni sezilip turdy. Máselen, ol joq jerden Úkimettiń qaısybir aımaqqa («dopýstım, na tot ılı drýgoı regıon» sııaqty sózderi – J.S. ) qandaı da bir somanyń bólinetindigi týraly aıtatynyn, odan keıin ol soma eki ret ózgertiletinin, aqyrynda ol tipti azaıatynyn aıtty. Sondyqtan kóptegen óńirler osyndaı máselelerge shaǵynyp jatady, dedi ol.
Jaqsybaı SAMRAT,
«Egemen Qazaqstan».