Nazarbaev Ýnıversıtetiniń túlekteri mektep oqýshylaryna oqýda kómektesedi. "NU Alumni" túlekter qaýymdastyǵy bilim berýdegi tálimgerlik boıynsha "E-Tutor" áleýmettik jobasyn iske qosady, dep habarlaıdy Egemen.kz.
Joba aıasynda NÝ túlekteri men stýdentteri qatarynan kýratorlar volonterlyq negizde 5-11 synyp oqýshylaryna birqatar pánder boıynsha mektep baǵdarlamasyn meńgerýge kómektesetin bolady. Oqýshylardy irikteý kezinde eń aldymen medısına qyzmetkerleriniń otbasy múshelerine, sondaı-aq kóp balaly otbasylar men halyqtyń áleýmettik osal toptaryna jatatyn otbasylardan shyqqan balalarǵa basymdyq beriletin bolady.
"E-Tutor" jobasy - bul vırtýaldy alań, onda oqýshylar pánderdi meńgerýde kómek alyp qana qoımaı, robot tehnıkasy, ınformatıka jáne baǵdarlamalaý boıynsha úıirmelerge jazyla alady. Sondaı-aq, mentorlarmen birge balalar olımpıadalarǵa daıyndalyp, emtıhandardy, sony ishinde IELTS jáne SAT-ti de tapsyra alady.
"Bizdiń joba qazaqstandyq oqýshylardyń álemdik bilim berý keńistigindegi básekege qabilettiligin arttyrýǵa járdemdesý úshin oılastyrylǵan. Búgingi tańda bizdiń jobamyz elordanyń birneshe mektebin ǵana qamtıdy, biraq bolashaqta elimizdiń ár óńirinen kelgen balalardy oqýda qoldaý arqyly onyń geografııasyn keńeıtýdi josparlap otyrmyz", dedi "NU Alumni" qoǵamdyq birlestiginiń atqarýshy dırektory Arman Qońqabaı.
Sabaqty oqýshynyń tańdaýyna baılanysty qazaq, aǵylshyn jáne orys tilderinde ótkizý josparlanýda. Ár oqýshy 3 pánge deıin tańdaı alady, ol boıynsha kýrator apta saıyn 45 mınýttan onlaın-sessııa ótkizedi. Barlyq bilim berý materıaldary: onlaın-sabaqtardyń jazbalary, ádistemelik anyqtamalyqtar, oqýlyqtar, emtıhandarǵa daıyndyq boıynsha usynymdar jáne t.b. jobanyń arnaıy saıtynda ornalastyrylatyn bolady.
Bul joba meni qyzyqtyrady jáne qazir men Reseıde jumys istep júrgenime qaramastan, ony qoldaýǵa bel býdym. Onyń ústine, barlyq jumys onlaın-formatta júrgiziletin bolady. Bizdiń josparymyzda - bilim alýshylarmen onlaın-konferensııalar ótkizý jáne kýratorlar, oqýshylar jáne olardyń ata-analary arasynda oqytý prosesi boıynsha turaqty keri baılanysty qamtamasyz etý, – dep atap ótti jobanyń qatysýshysy, Máskeýdegi GeoSteering Technologies kompanııasynda geomehanık- ınjener bolyp jumys isteıtin NÝ túlegi Temirlan Jekenov.
Búgingi kúni jobaǵa irikteýdiń barlyq talap etiletin kezeńderinen ótken 69 kýrator-túlekter qatysýǵa nıet bildirdi. NÝ túlekterinen ótinimderdiń túsýi jalǵasýda.