Máýlen Áshimbaevtyń tóraǵalyǵymen Senat bıýrosy ótip, aldaǵy jalpy otyrysta qaralatyn kún tártibi talqylandy. Osy oraıda Májilisten kelip túsken zań jobalary komıtetter arasynda bólinip berildi, dep habarlaıdy Egemen.kz.
Senat bıýrosynyń otyrysynda Máýlen Áshimbaev Parlamentke 1 qyrkúıekte kelip túsken úsh jylǵa arnalǵan respýblıkalyq bıýdjet jobasyna depýtattardyń nazaryn aýdardy. Senat tóraǵasy eldiń basty qarjy qujatymen jumystyń naqty merzimin belgiledi.
"Biz osy zańdy 1 jeltoqsanǵa deıin qabyldaýymyz kerek. Ony ózderińiz jaqsy bilesizder. Sondyqtan Senat depýtattary Májilistegi áriptesterimen birge atalǵan zań jobasy boıynsha jumysty bastady. Respýblıkalyq bıýdjet jónindegi zań jobasyn ýaqytyly ári sapaly qabyldaý Parlament pen Úkimettiń tıimdi ózara is-qımylyna baılanysty", dedi Máýlen Áshimbaev.
Senat tóraǵasy jurtshylyq memlekettik qarjyny bólý máselelerine erekshe nazar aýdaratynyn, qoǵamda respýblıkalyq bıýdjetti josparlaýǵa qoıylatyn talaptar arta túskenin eske saldy. M. Áshimbaev ony oń úrdis retinde sanaıdy. Sondyqtan parlamentshiler zań jobasyn muqııat zerdelep, qoǵam tarapynan bar suranystardy eskere otyryp pysyqtaýy qajet.
Senat bıýrosynyń otyrysynda 24 qyrkúıekte ótetin aldaǵy jalpy otyrystyń kún tártibi de belgilendi. Depýtattar "2014 jylǵy 29 mamyrdaǵy Eýrazııalyq ekonomıkalyq odaq týraly shartqa Qyrǵyz Respýblıkasynyń qosylýyna baılanysty Qyrǵyz Respýblıkasynyń 2014 jylǵy 29 mamyrdaǵy Eýrazııalyq ekonomıkalyq odaq týraly shartty, Eýrazııalyq ekonomıkalyq odaqtyń quqyǵyna kiretin jekelegen halyqaralyq sharttardy jáne Eýrazııalyq ekonomıkalyq odaq organdarynyń aktilerin qoldanýy jónindegi jaǵdaılar men ótpeli erejeler týraly 2015 jylǵy 8 mamyrda qol qoıylǵan hattamaǵa ózgeris engizý týraly hattamany ratıfıkasııalaý týraly" zań jobasyn qaraıdy.
Senatorlar Palatanyń qaraýyna "Qazaqstan Respýblıkasy men Birikken Arab Ámirlikteri arasyndaǵy sottalǵan adamdardy berý týraly shartty ratıfıkasııalaý týraly" zań jobasyn da shyǵardy. Sonymen qatar, bıýroda Májilisten kelip túsken zań jobalary komıtetterge bólinip berildi.
"Qazaqstan Respýblıkasynyń keıbir zańnamalyq aktilerine mádenıet máseleleri boıynsha ózgerister men tolyqtyrýlar engizý týraly" zań jobasy boıynsha Áleýmettik-mádenı damý jáne ǵylym komıteti bas komıtet bolyp belgilendi.
"Qazaqstan Respýblıkasy men Ýkraına arasyndaǵy qylmystyq ister boıynsha quqyqtyq kómek týraly shartty ratıfıkasııalaý týraly" zań jobasy boıynsha Konstıtýsııalyq zańnama, sot júıesi jáne quqyq qorǵaý organdary komıtetine qorytyndy daıyndaý tapsyryldy.