BUU-nyń tereń tarıhy belsendi ujymdyq kúsh-jigerdiń arqasynda keń aýqymdy máselelerdi talqyǵa salý kezeńi boldy. Bul týraly Qazaqstan Prezıdenti Qasym-Jomart Toqaev Birikken Ulttar Uıymy Bas Assambleıasynyń mereıtoılyq sessııasy aıasynda BUU 75 jyldyǵyna arnalǵan Joǵary deńgeıdegi kezdesýdegi beıneúndeýinde aıtty, dep habarlaıdy Egemen.kz
«Adamzat jylnamasyndaǵy eń joıqyn Dúnıejúzilik soǵystan keıin 1945 jyldyń maýsym aıynda múldem jańa Uıymnyń qurylýy – barshamyz úshin aıtýly ári tarıhı oqıǵa. Dag Hammarsheldtiń Birikken Ulttar Uıymy «bizdi jumaqqa jetkizý úshin emes, tozaqtan qutqarý úshin qurylǵan» degen qanatty sózi barshaǵa aıan. Bastapqyda BUU ujymdyq qaýipsizdikti qamtamasyz etý júıesi retinde qurylǵanymen, is júzinde álem elderin ortaq maqsat pen múddege biriktirdi. Sonyń arqasynda belsendi ári aýqymdy halyqaralyq yntymaqtastyq dáýiri ornyqty», - dep atap ótti Qazaqstan Prezıdenti. Osy oraıda Memleket basshysy bul jol jeńil bolmaǵanyn eske saldy.
«О́kinishke qaraı, ótken 75 jyl ishinde álemdi qaıǵy-qasiretten aryltýǵa baǵyttalǵan ortaq maqsattarymyz ben qundylyqtarymyzdy ilgeriletý jolynda kóptegen múmkindikti qoldan jiberip aldyq. Degenmen, sátsizdikten de, jetistikten de sabaq alǵan jón. BUU-nyń tereń tarıhy belsendi ujymdyq kúsh-jigerdiń arqasynda keń aýqymdy máselelerdi talqyǵa salý kezeńi boldy. Atap aıtqanda, otarsyzdanýdan ósip-órkendeýge, balalardy qorǵaýdan klımattyń ózgerýine, densaýlyq saqtaý isinen adam quqyǵyna, beıbitshilikti qoldaýdan bitimgershilikke deıingi taqyryptar qamtyldy. Sońǵy otyz jylda Qazaqstan BUU-nyń barlyq basty organdarynda, sonyń ishinde, Qaýipsizdik keńesinde janjaldardy retteý, ıadrolyq qarýdy taratpaý jáne qarýsyzdaný, terrorızmge qarsy kúres, konfessııaaralyq jáne ultaralyq dıalog, teńizge shyǵa almaıtyn damýshy elderdiń múddesin qorǵaý sııaqty basymdyqtardy dáripteýge atsalysty», - dedi Qasym-Jomart Toqaev.
«Al, endi búgingi zamannyń sıpatyna zer salsaq, kóptegen jańa syn-qaterler, sondaı-aq qaıta etek alǵan keıbir táýekelder bizdi ótken kezeńge oraltýy múmkin ekenin baıqaımyz. Qazirgi tańda mýltılateralızm zor qaterge tap boldy. Mundaı ahýal qyrǵı-qabaq soǵys aıaqtalǵannan beri týyndamaǵan edi», - dedi QR Prezıdenti.