COVID-19 daǵdarysynan álem qandaı sabaq alýy tıis jáne pandemııanyń saıası saldary – Nazarbaev Ýnıversıteti Jaratylystaný, gýmanıtarlyq jáne áleýmettik ǵylymdar mektebiniń qaýymdastyrylǵan professory, doktor Jan-Fransýa Karonnyń jańa kitaby dál osy máselelerge arnalǵan. Onyń «COVID-19 daǵdarysynan keıingi álem týraly ocherk» atty eńbegin halyqaralyq jetekshi Springer baspa úıleriniń biri jarııalady.
Doktor Karonnyń kitaby birneshe esseden turady, onda avtor lıberalızmniń syn-qaterleri men jahandanýdy basqarý máselesinde daǵdarys ashqan jańa múmkindikter týraly aıtady. Professor óz eńbeginde COVID-19 daǵdarysyna baılanysty Qytaı men Batys elderi arasyndaǵy qatynastardyń dınamıkasyna da kóńil bóldi.
«Álem kózge kórinbeıtin jáne ustatpaıtyn jaýmen soǵysýda, bul barlyq elderdi teńdessiz sharalardy qoldanýǵa májbúr etti. Árıne, buryn mundaı jaǵdaılar da bolǵan sııaqty, adamzatqa tóngen kez kelgen qater tereń saıası tolqýlarǵa, tipti álemdik tártiptiń ózgerýine ákelýi múmkin», deıdi doktor Jan-Fransýa Karon.
Springer baspasy doktor Karonnyń jumysyn «COVID-19 daǵdarysynyń saıası saldaryn jáne halyqaralyq ekonomıkada bolýy múmkin júıelik ózgeristerdi qarastyratyn alǵashqy kitap» dep atady.
Bul jumys saıasattanýshylar men fılosoftar úshin de, jalpy jurtshylyq úshin de, pandemııadan keıin álem qandaı bolatyndyǵy týraly udaıy oılaıtyn adamdar úshin de qyzyqty bolady.
Aıta ketelik, doktor Jan-Fransýa Karon Nazarbaev Ýnıversıtetiniń Saıasattaný jáne halyqaralyq qatynastar kafedrasynyń qaýymdastyrylǵan professory. NÝ-da jumys istemes buryn, doktor Karon Monkton ýnıversıtetinde (Kanada), sondaı-aq Laval, Shıkýtımıdegi Kvebek ýnıversıtetterinde, Brıýsseldiń erkin ýnıversıtetindegi Eýropalyq zertteýler ınstıtýtynda sabaq berdi.
Doktor Karonnyń zertteýleri kópultty memleketterdegi birlik pen saıası turaqtylyq máselelerin zertteýge, etnomádenı ártúrlilik kontekstindegi ulttyq sáıkestilikti baǵalaýǵa, sondaı-aq qazirgi áskerı etıkaǵa baǵyttalǵan. Onyń monografııalary «Saıasat», «Saıasat tarıhynyń habarshysy», Ultshyldyq jáne etnıkalyq saıasat, Ulttyq sáıkestilik, Kanadalyq halyqaralyq zertteýler jýrnaly, Mádenıetaralyq zertteýler jýrnaly jáne Áskerı etıka jýrnaly sııaqty ártúrli jýrnaldarda jaryq kórdi.