Almaty turǵyny Sandýǵash Orazova Dımash Qudaıbergenniń jankúıerlerine qazaq tilin tegin úıretedi, dep habarlaıdy Egemen.kz.
Mamyr aıynda Kanadadan kelgen Dımash Qudaıbergenniń jankúıerleriniń biri Facebook paraqshasynda qazaq tiliniń oqytýshysyn izdep jatqanyn jazǵan. Sandýǵash jaýap berýge sheshim qabyldap, sodan beri ol sabaq berip, tipti vıdeo sabaqtardy jazady. Olardy Dımashtyń Fangrýppasynyń YouTube-kanalynda jarııalaıdy.
"Dımashtyń arqasynda qazaq ánderi men Qazaq tili búkil álemde tanymal boldy, men ony maqtan tutamyn. Men de sheteldikter arasynda qazaq tilin jáne elimizdiń baı mádenı murasyn tanymal etýge óz úlesimdi qosqym keledi. Sondyqtan men habarlandyrýǵa ún qatyp, olarǵa qazaq tilin tegin úıretýdi usyndym. Olardyń ótinishi boıynsha birinshi sabaǵymyz Dımashtyń oryndaýyndaǵy "Daıdıdaý" ániniń sózderi", deıdi Sandýǵash.
Búginde onyń 40 elden 100-den astam stýdenti bar. Olardyń arasynda tipti Chılı, Gvatemala, Kolýmbııa, Argentına, Fılıppın jáne basqa da kóptegen elderdiń turǵyndary bar.
Sandýǵashtyń ózi de Dımash shyǵarmashylyǵynyń jankúıeri, onyń kóptegen konsertterinde boldy. "Osy sátti paıdalana otyryp, Dımashqa barsha qazaqstandyqtardyń atynan Qazaqstandy búkil álemge tanymal etýdegi baǵa jetpes eńbegi jáne óz Otanyna degen sheksiz mahabbaty úshin alǵys aıtqym keledi", dep bólisti ol.