Qaraǵandy oblysynda urlanǵan kólik órtenip ketti, dep habarlaıdy Egemen.kz qalalyq polısııa departamentiniń baspasóz qyzmetine silteme jasap.
Polısııaǵa aýyldan shyǵa beriste qatty jyldamdyqpen júrgen kólik aýdarylyp, órtenip ketkeni týraly habarlama túsken.
20 qyrkúıek kúni Qaraǵandy oblysy Buqar jyraý aýdandyq polısııa basqarmasyna Qaraǵandy qalasynyń 47 jastaǵy turǵyny habarlasyp, aýdan ortalyǵyna týysynyń úıine kelgende túngi saǵat 1:00 shamasynda belgisiz bireý aýlada turǵan avtokóligin aıdap áketkenin jetkizgen.
"Arada birshama ýaqyt ótkende polısııaǵa aýyldan shyǵaberiste qatty jyldamdyqpen júrgen kóliktiń aýdarylyp, órtenip ketkeni týraly habarlama túsken. Oqıǵa ornyna kelgen polısııa qyzmetkerleri órtengen urlanǵan kólik ekenin anyqtady. Kýágerler kólik aýdarylǵanda onyń ishinen belgisiz azamat shyǵyp, oqıǵa ornynan izin sýytqanyn aıtqan", delingen habarlamada.
Avtokóliktiń qatty órtengeni sonshalyqty, qaıta jóndeýge jaramsyz bolǵan. Jábirlenýshige keltirilgen shyǵyn kólemi úsh mıllıon teńgeden asqan.
Jedel izdestirý is-sharalary barysynda polısııa qyzmetkerleri atalǵan iske qatysy bar degen kúdikpen 28 jastaǵy er adamdy ustap, oǵan qatysty Qazaqstan Qylmystyq kodeksiniń 200-babyna sáıkes qylmystyq is qozǵady. Qazirgi ýaqytta tergeý amaldary júrgizilip jatyr.