Soltústik Qazaqstan oblysynyń Polısııa departamentinde Memleket basshysy Qasym-Jomart Toqaevtyń Joldaýyn iske asyrý sharalary aıasynda polıseılerdiń aldynda turǵan basym mindetter týraly sóz qozǵaldy.
Ishki ister mınıstrligi Krımınaldyq polısııa departamentiniń bastyǵy Dýman Taev osy maqsatpen oblysqa kelip, vedomstvo bólinisteriniń basshylarymen kezdesti. Beıneselektor rejiminde oǵan aýdandyq polısııa bólimderiniń basshylary men jeke quramy qatysty.
Polkovnık D.Taev Joldaý talaptaryn iske asyrý boıynsha Ishki ister mınıstri Erlan Turǵymbaev belgilegen mindetterdi qyzmetkerlerge jetkizdi. Sonyń ishinde ýchaskelik polısııa ınspektorlarynyń mártebesin arttyrý, olardyń tanymaldylyǵy jáne qol-jetimdiligi qamtamasyz etilýi kerektigi aıtyldy. Osy talapty oryndaý boıynsha qazirdiń ózinde sharalar qabyldanýda, onyń ishinde ýchaskelik ınspektordy áleýmettik jaǵynan qoldaý máselesi kóterilýde. Sonymen birge «Anıskınderdiń» jumysy «servıstik modelge» negizdelýi kerek, onyń formaty halyq únine qulaq asýǵa, olardyń qajettilikterine jedel yqpal etýge kúsh salýdy kózdeıdi.
Barlyq polısııa qyzmetkerlerine qatysty taǵy bir negizgi baǵyt – penıtensıarlyq mekemelerde jáne polısııanyń qyzmettik bólmelerinde jappaı beınebaqylaýdy engizý bolyp otyr. Ashyqtyq polısııa qyzmetindegi aınymas atrıbýttardyń biri bolýy kerek, ol jumys sapasyn jaqsartyp qana qoımaı, sonymen birge kez kelgen sybaılas jemqorlyq táýekelderiniń jáne basqa da zań buzýshylyqtardyń kórinisterine senimdi tosqaýyl bola alady.
Dýman Taev Ishki ister mınıstrliginde sybaılas jemqorlyqqa qarsy kúres máseleleri erekshe nazarda ekenin atap aıtty. Polısııa qyzmetkerleriniń jumysyna belsendi aqparattyq qoldaý kórsetý, onyń ishinde áleýmettik jelilerde, «ashyq qabyldaýlar» ótkizý, turǵyndarmen tıimdi dıalog ótkizý turaqty qalyptasýda.
Qyzmettiń barlyq salasyna engizilip jatqan sıfrly tehnologııalar osy sharalardy iske asyrýdyń alańyna aınaldy. Qylmystyq isterdi tergeý birtindep elektrondy formatqa kóshirilýde. Bıyl sotqa deıingi tergeýlerdiń 37,2 paıyzy osy ádispen júrgizildi. IIO usynatyn memlekettik qyzmetterdiń 83 paıyzyn elektrondy túrde jasaýǵa bolady. Patrýldik polısııanyń planshettermen, beınetirkeýishtermen, termınaldarmen jabdyqtalýy sıfrlandyrýdyń mańyzdy qadamy bolyp otyr. Al «Jol júrisi týraly» Zańǵa ázirlengen túzetýler júrgizýshilerge júrgizýshi kýáligi, saqtandyrý polısi jáne tirkeý kýáligi bolýyn tekserý qajettiligin joıady. Aqparattyq júıeler arqyly polısııa qyzmetkerleri atalǵan qujattardyń bolýyn ózderi anyqtap alady.
Beınebaqylaý júıeleri barǵan saıyn belsendi túrde joldarda jáne basqa da qoǵamdyq oryndarda zańdylyq pen tártipti nyǵaıtýǵa kómegin tıgizýde. Búgingi tańda elimizde 230 myńǵa jýyq beınekamera bar, olardyń kómegimen jyl saıyn 5 myńnan astam qylmys ashylyp, 400 myńǵa deıin ákimshilik quqyq buzýshylyq anyqtalady.
Soltústik Qazaqstan oblysy Polısııa departamentiniń bastyǵy, polısııa polkovnıgi Marat Tólebaev is-sharany qorytyndylaı kele, soltústikqazaqstandyq polısııanyń jeke quramy júktelgen mindetterdi oryndaý úshin barlyq kúsh-jigerin salatynyna senim bildirdi.
Soltústik Qazaqstan oblysy