Kezdesýde quramyna volonterlik uıymdar men qozǵalystardyń barlyq ókili kiretin biryńǵaı platforma qurý máselesi talqylandy. Bul týraly Nur-Sultan qalasynyń ákimi Altaı Kólginov óziniń Instagram paraqshasynda jazdy, dep habarlaıdy Egemen.kz.
"Qalalyqtar pandemııa kezinde uıymshyldyq tanytty, jaqyndaryna kómektesip, COVID-19 taralmaýyna ózderiniń úlesin qosty. Eriktiler baqylaý-ótkizý beketterinde kezekshilik atqardy, dezınfeksııa jasaýǵa qatysty, jedel shtabta da jumys istedi. Azamattarymyzdyń turmysy tómen sanattaryna dári-dármek, azyq-túlik pen qorǵanýǵa arnalǵan zattardy taratty. Birlesken eńbektiń arqasynda jaǵdaıdy turaqtandyra aldyq.Memleket basshysy qaıyrymdylyq, volonterlik uıymdar jáne bıznes salasy ókilderimen onlaın kezdesýde qaıyrymdylyq pen volonterlik pandemııa kezinde jalpyulttyq deńgeıge jetip, áleýmettik normaǵa aınala bastaǵanyn aıtty. Prezıdent volonterlik qyzmetti damytý, qaıyrymdylyq jáne mesenattyqty qoldaý – memlekettiń uzaq merzimdi basymdyǵy ekenin atap ótti.
Elbasy bastamasy boıynsha qurylǵan "Biz birgemiz" qory myńdaǵan otbasyǵa qarjylaı kómek kórsetti, qalalyqtar joǵary áleýmettik jaýapkershilik tanytty.
Kezdesýde quramyna volonterlik uıymdar men qozǵalystardyń barlyq ókili kiretin biryńǵaı platforma qurý máselesin talqyladyq. Bul eshkim shet qalmas úshin muqtaj adamdarǵa jeke-jeke kómek kórsetýge múmkindik beredi. Buǵan qosa bólingen kómektiń ashyqtyǵy qamtamasyz etiledi. Sondaı-aq volonterlik uıymdardy damytý jáne qoldaýdyń birqatar baǵyty jaıly sóz qozǵadyq.
Búgin Prezıdent atynan belsendi eriktiler men azamattarǵa "Halyq Alǵysy" medalin tabystadym. Osyndaı qıyn kezeńde aıanbaı eńbek etip, ózara járdemdeskenderińiz úshin alǵys aıtamyz", - dep jazdy Altaı Kólginov.