Atyraýda bıylǵy jylý berý maýsymyna daıyndyq qarqyn aldy. О́ńirde jylý berý maýsymyna 6,3 mlrd teńge bólingen. Onyń 3,6 mlrd teńgesi jergilikti bıýdjetten, al 2,7 mlrd teńge kásiporyndar esebinen qarastyrylyp otyr. Bul týraly Oblystyq energetıka jáne turǵyn úı-kommýnaldyq sharýashylyǵy basqarmasynyń basshysy Baýyrjan Tuhfatov málimdedi.
– Kópqabatty turǵyn úılerdiń 98 paıyzy, bilim berý men medısına salasynyń nysandary tolyqtaı gıdravlıkalyq synaqtan ótti. Buǵan qosa uzyndyǵy 19,6 shaqyrymǵa sozylǵan jylý, 782,8 shaqyrym bolatyn elektr, 3,08 shaqyrymdyq sý, káriz jelileri, sondaı-aq 20 shaqyrymǵa jýyq jylý jelisi túgeldeı jóndeýden ótti. Atyraý qalasynyń Nursaıa shaǵyn aýdanyndaǵy dıametri 425 mm-lik jalpy uzyndyǵy 3 045 metrdi quraıtyn magıstraldy jylý qubyryna jóndeý jumystary aıaqtaldy. Sonymen qatar Inder aýdanyndaǵy 7 jylytý qazandyǵy tolyǵymen jańasyna aýystyryldy, – dedi Baýyrjan Tuhfatov.
Oblystyq densaýlyq saqtaý basqarmasynyń basshysy Nurlybek Qabdyqaparovtyń málimetine súıensek, 147 medısınalyq mekeme bar. Onyń 41-i oblys ortalyǵynda, qalǵany aýdandarda ornalasqan. Bul nysandardyń bári jylý berý maýsymyna tolyqtaı daıyn. Biraq eki nysanda, naqtyraq aıtqanda Mahambet aýdandyq aýrýhanasy men «Birlik» dárigerlik ambýlatorııasynda jylý jóndeý jumystary aıaqtalǵannan keıin berilgeli otyr.
Sondaı-aq 408 bilim berý oshaǵynda jylý berýge daıyndyq jasalǵanymen, bes nysanda kúrdeli jóndeý jumystary júrip jatyr. Oblystyq bilim basqarmasynyń basshysy Satqan Esenǵalıev bul jumys bilim berý uıymdarymen jasalǵan kelisimsharttarǵa sáıkes aıaqtalatynyna sendirip otyr.
Alaıda oblys ákimi Mahambet Dosmuhambetov atalǵan baǵytta sheshimin tappaǵan máselelerdiń baryna nazar aýdardy. О́ıtkeni turalap qalǵan jumystardy qaıta jandandyrý kerek.
– Oblysta kópqabatty turǵyn úılerge jylytý qazandyqtaryn ornatýda talaptarǵa sáıkes kelmeıtin jaǵdaılar kezdesedi. Osyǵan naqty taldaý júrgizilýi qajet. Sonymen qatar aımaqta tabıǵı gaz tutynýǵa baılanysty 15 mln teńge kóleminde debıtorlyq bereshek bar. Ony óteý úshin naqty jospar jasalýy tıis. Atyraý qalasyndaǵy 31,5 shaqyrym ıesiz jylý jelisi men «Balyqshy», «Bereke», «Nursaıa» shaǵyn aýdandaryn teńgerimge berý jumystary uıymdastyrylýy kerek. О́ıtkeni jylý maýsymy kezinde eshqandaı másele týyndamaı, turǵyndardy jylýmen úzdiksiz qamtamasyz etýimiz kerek. Bul – bizdiń basty mindetimiz, – dedi M.Dosmuhambetov.
Atyraý oblysy