Aqtóbege jetkizilgen 19 jańa jedel járdem kóliginiń 13-i aýdandyq aýrýhanalarǵa jóneltilip, 6-ýy Aqtóbe qalasyndaǵy jedel járdem beketine berildi.
Qazir óńirde epıdemııalyq jaǵdaı turaqtanǵan. Oblys ortalyǵynda jedel járdem shaqyrtý úsh ese, naýqastardy stasıonarlarǵa jatqyzý 10 esege tómendep, qalalyq juqpaly aýrýlar aýrýhanasyndaǵy tósektik oryn júktemesi 78%-dan 16,2%-ǵa azaıǵan. Degenmen, kún sýyta sýyq tııý men jedel respıratorly syrqattardyń kóbeıýimen qaıtadan COVID-19 kúsheıýi múmkin degen boljam bar bolǵandyqtan aldyn ala daıyndyq júrgizildi.
Pnevmonııamen syrqattanýshylar úshin 315 tósektik oryn daıyndalsa, odan basqa 3 588 tósektik oryn rezervke qoıyldy.
«Qajet bolǵan jaǵdaıda tósektik oryndardy 315-ten 3 903-ke deıin, sonyń ishinde jansaqtaý bólimindegi oryndar sanyn 401-ge deıin kóbeıtý josparlanyp otyr. Jazda 2 emdeý mekemesi jóndelip, stasıonarlar qajetti jabdyqtarmen qamtamasyz etildi. Kereýetter ottegimen 93%-ǵa qamtylyp, úsh stasıonar ortalyqtandyrylǵan ottegimen qamtamasyz etildi. Aldaǵy kúnderi ókpeni jasandy jeldetetin 147 apparat, kompıýterlik tomograf, 13 stasıonarlyq rentgen apparaty, eki jyljymaly rentgen apparaty, avtonomdy ottegi beketi men KamAZ túrindegi eki jyljymaly medısınalyq keshen jetkiziledi dep kútilip otyr», deıdi oblys ákiminiń orynbasary Nurjaýǵan Qalaýov.
Bul kúnderi 47 622 aqtóbelik tumaýǵa qarsy egildi.
Aqtóbe oblysynyń ákimi Ońdasyn Orazalın aýdan ákimderine barlyq aýrýhanalardyń sanıtarlyq talaptarǵa sáıkestigin qatań tekserip, medısınalyq jabdyqtardy, dári-dármekter men jeke qorǵanys zattaryn qaıta túgendeýdi tapsyrdy. О́ıtkeni «Syrqat sany kóbeıgen jaǵdaıda, qalalyq stasıonarlarǵa júk túspeýi kerek».
Aqtóbe oblysy