Polısııa qyzmetkerleriniń málimetinshe, jol apaty keshe, 4 qazanda Qyzylqoǵa aýdanyndaǵy Jamansor stansııasynyń mańynda bolǵan, dep habarlaıdy Egemen.kz.
Osy aýyldyń tusymen ótetin "Atyraý-Aqtóbe" tas jolynda Renault Duster men Geely kólikteriniń soqtyǵysýynan 9 adam mert boldy.
Renault Duster kóligindegi tórt jolaýshy Qyzylqoǵa aýdanyndaǵy Mııaly aýylynan Atyraý qalasyna baǵyt alǵan eken. Al Geely kóligine otyrǵan bes jolaýshy Atyraýdan Saǵyz selosyna barý úshin jolǵa shyqqan. Alaıda bári dittegen jerine jete almady.
Toǵyz adamnyń ómirin úzgen bul oqys oqıǵa Ishki ister mınıstri Erlan Turǵymbaevtyń ózin alańdatyp otyr. Mınıstrdiń málim etýinshe, jol-kólik oqıǵalarynyń 96% júrgizýshilerdiń kinásinen oryn alady. Patrýldik kezekshilikter jáne beınekameralar joq avtojoldar men tas joldardarda júrgizýshiler óreskel ereje buzady. Naqtyraq aıtqanda, jyldamdyqty shamadan tys arttyryp, tyıym salynǵan jáne qaýipti aımaqtarda aldaǵy kólikti basyp ozýǵa tyrysady. Al mundaı jeligýdiń sońy kóbine qaıǵyly apatqa, orny tolmas ókinishke uryndyrady.
"IIM-niń statıstıkalyq málimetteri "tájirıbesiz" júrgizýshilerdiń (kólik júrgizý ótili 1 jyldan tómender) úlesine jol-kólik oqıǵalarynyń tek 1,8 %-i ǵana tıetinin kórsetedi. Jol apattarynyń basym bóligi tájirıbeli júrgizýshilerdiń tarapynan oryn alady eken. Olar qaýipti táýekelderge sanaly túrde baryp, ózderiniń ǵana emes, basqa adamdardyń ómirine de úlken qater tóndiredi.
Sondaı-aq, Ishki ister mınıstrligi jol-kólik oqıǵasynyń negizgi sebepterin qaperge salady:
– birinshi orynda jyldamdyqty arttyrý (33,1 %);
– ekinshisinde – manevr jasaý erejelerin buzý (17,7 %);
– úshinshi orynda – rettelmeıtin jaıaý júrginshiler ótkelinen ótý erejelerin buzý (7,6 %).
IIM avtokólik júrgizýshilerin jol qozǵalysy erejeleri men shekteýlerin qatań eskerýge shaqyrady. Al jaıaý júrginshilerge jolda qyraǵy bolýdy eskertedi", dep jazba qaldyrdy áleýmettik jelide mınıstr Erlan Turǵymbaev.