Búgingi tańda Nur-Sultan, Almaty jáne Shymkent qalalarynda medısınalyq mekemeler ókpeni jasandy jeldetý (О́JJ) apparattarymen tolyq qamtamasyz etildi. Jalpy alǵanda bul qalalarǵa 402 О́JJ apparaty jetkizildi, dep habarlaıdy Egemen.kz
Qyzylorda, Almaty, Aqtóbe, Qostanaı, Pavlodar, Aqmola, Qaraǵandy oblystaryna 384 apparat jóneltildi. Jalpy elimizdiń barlyq óńirine 1,5 myń О́JJ apparatyn jetkizý josparlanǵan. Bul jospardy aǵymdaǵy jyldyń 15 qazanyna deıin iske asyrý kózdelip otyr.
Qazaqstanda memlekettiń qatysýymen О́JJ apparattaryn "Qazaqstan Aselsan ınjınırıng" JShS (Nur-Sultan) jáne "Tynys" AQ (Kókshetaý) sııaqty 2 kásiporyn shyǵarady. Atalǵan kásiporyndar – "Qazaqstan ınjınırıng" UK" AQ ulttyq kompanııasynyń enshiles uıymdary.
Koronavırýs pandemııasyna baılanysty elde qalyptasqan epıdemııalyq jaǵdaıǵa oraı ókpeni jasandy jeldetý apparattarynyń jetispeýshiligin eskerip, "Qazaqstan Aselsan ınjınırıng" JShS qysqa ýaqyt ishinde ókpeni jasandy jeldetetin stasıonarlyq apparattar óndirisin ıgerdi.
Al "Tynys" AQ "Kókshetaý-4P" О́JJ 680 mobıldi apparatyn shyǵarady. Medısına mamandarynyń pikirinshe, apparat qoldanýǵa yńǵaıly ári senimdi jáne elektr qýatyna táýeldi emes. Kásiporynnyń óndiristik qýaty aıyna 500 О́JJ apparatyn shyǵarýǵa jetedi.
Odan bólek, "Tynys" AQ О́JJ portatıvti apparattaryn, "Kókshetaý 3" medısınalyq buıymdardyń túrli nomenklatýrasyn, onyń ishinde kóp rettik betperdelerdi, múgedekterge arnalǵan arbalardy jáne t. b. zattardy shyǵaryp jatyr.
Bul kásiporyndardyń negizgi qyzmeti Qazaqstan Respýblıkasynyń jáne ózge de elderdiń Qarýly Kúshteriniń qajettilikteri úshin joǵary tehnologııalyq ónimder shyǵarýǵa baǵyttalǵan. Al О́JJ óndirisi medısınalyq mekemelerdiń qajettilikterin óteýge baǵyttalǵan memlekettik tapsyrys aıasynda jolǵa qoıyldy.
Kásiporyndar qosymsha qajettilik týyndaǵan jaǵdaıda medısınalyq tehnıka men kez kelgen ónimdi qajet mólsherde óndirip, jetkize alady.