Jylý maýsymy bastalǵanda, Aqtóbe qalasynyń shetindegi baý-baqsha ujymdaryndaǵy eski úılerde kómirmen jaǵylatyn peshterdiń jaramsyzdyǵynan turǵyndardyń ys tıip, ýlanýy jıi oryn alady. Tótenshe jaǵdaılar basqarmasynyń mamandary órt qaýipsizdiginiń qarapaı̆ym erejelerin saqtaýǵa shaqyrǵanymen, jyl saıyn baý-baqsha ujymdarynda aqaýly peshterden órt shyǵyp, ne ys tııý jaǵdaıy únemi qaıtalanyp jatady, dep habarlaıdy Egemen.kz.
Birer kún buryn qaladaǵy temir qorytpa zaýyty aýmaǵyndaǵy №9 baý-baqsha ujymyndaǵy jeke turǵyn úıde 13 jáne 11 jastaǵy eki balaǵa aqaýly peshten shyqqan gazdan ýlanyp qaldy. Oqıǵa tún ishinde bolǵan. Bir alańdatarlyǵy, osy kezde úıde balalar ǵana bolǵan, olardy esten tanyp jatqan kúıinde túngi saǵat ekide úılerine kelgen eresekter kórgen. Jedel járdem olardy dereý oblystyq balalar aýrýhanasyna jetkizdi. Qazir balalardyń jaǵdaıy jaqsardy.
Oblystyq tótenshe jaǵdaılar basqarmasy mamandary jazda peshterdiń jarylǵan, tesilgen jerlerin bitep, murjany kúı̆eden tazartyp qoıý kerektigin baý-baqsha ujymdarynyń turǵyndaryna qansha eskertkenimen, kópshiligi qulaq asa bermeıdi.
6 qazanda Aqtóbedegi Bókenbaı batyr kóshesindegi kópqabatty úıdiń úshinshi qabatynda elektr jelileriniń tuıyqtalýy sebebinen órt shyǵyp, jalyn lezde altynshy qabatqa deıin kóterildi. Shaqyrtýǵa jedel jetken órt sóndirýshiler eń áýeli podezden 25 eresek turǵyn men 15 balany syrtqa shyǵaryp úlgerdi. Qaladaǵy mamandandyrylǵan №2 órt sóndirý bóliminiń starshınasy Adaı Sembın órt kezinde altynshy qabattaǵy páterinen shyǵa almaı qalǵan júkti kelinshekti jedel satymen alyp shyqty. Tútinnen ýlandy degen kúdikpen jedel járdem aýrýhanasyna jetkizilgen júkti áıeldiń densaýlyǵyna qaýip joq.