Eki mektep qurylysy. Eki túrli esep

Bul kimnen ketken qatelik?

Astana qalasyna irgeles eldi mekenderdi damytýdyń keshendi jospary óńir ómirine eleýli serpin berdi. Qazir munda ónerkásip pen aýyl sharýashylyǵy, onyń ónimderin qaıta óńdeý baǵytyndaǵy qýatty nysandar jumys isteı bastady.

Aıryqsha aımaq áleýmettik nysandarymen de túrlene túsýde. Qosshy aýylynda zamanaýı turǵyn úıler, Jibek joly aýylynda záýlim mektep ǵımaraty boı kóterse, bıyl bes aýylda 4500 oqýshyǵa arnalǵan mektep, úsh aýylda balalar baqshasy, Aqmolda ortalyq aýrýhana qurylysy qarqyn alǵan.

Bul kimnen ketken qatelik?

Astana qalasyna irgeles eldi mekenderdi damytýdyń keshendi jospary óńir ómirine eleýli serpin berdi. Qazir munda ónerkásip pen aýyl sharýashylyǵy, onyń ónimderin qaıta óńdeý baǵytyndaǵy qýatty nysandar jumys isteı bastady.

Aıryqsha aımaq áleýmettik nysandarymen de túrlene túsýde. Qosshy aýylynda zamanaýı turǵyn úıler, Jibek joly aýylynda záýlim mektep ǵımaraty boı kóterse, bıyl bes aýylda 4500 oqýshyǵa arnalǵan mektep, úsh aýylda balalar baqshasy, Aqmolda ortalyq aýrýhana qurylysy qarqyn alǵan.Sondaı-aq, 1,5 mıllıard teńge kólemindegi jergilikti bıýdjet qarjysyna Aqmol aýylynyń sý tartý júıeleri qaıta jańǵyrtylyp, 5 eldi mekenniń kósheleri jaryqtandyryldy. Qajymuqan, Qarajar aýyldarynda medpýnkt­ter ashylyp, taıaý kúnderi taǵy da úsh balabaqsha jumysqa qosylmaq. Bul ıgilikter ishki kóshi-qon máselelerin retteý­ge, jumys oryndarynyń kóptep ashylýyna septigin tıgizedi.

Deı tursaq ta, memlekettiń qarjy saıasatynda ár nárseniń óz ólshemi, óz suraýy bolady. Elbasy Nursultan Nazarbaev Úkimettiń 2013 jyldyń 9 aıyndaǵy jumys qorytyndylaryn talqylaǵan keńeıtilgen májiliste osyǵan qaratyp qatań syndar aıtty. «Qýaty da kólemi de birdeı eki nysannyń baǵasy eki túrli bolatynyna nege shúbá keltirmeısińder? – dedi Prezıdent. – Máselen, Aqmola oblysynda 1200 oryndyq mektep dál sondaı 900 oryndyq mektepten 219 mln. teńgege arzanǵa túsken». Osyǵan baılanysty biz oblystaǵy quzyrly mekemelerdiń bárine suraý salyp, aldymen bilim basqarmasynyń jáne qurylys basqarmasynyń basshylary Balym Izbasarovamen, Mıhaıl Kosachevpen tildeskenbiz. Oblys ákiminiń salalyq orynbasary Ermek Marjyqpaevtyń qabyldaýynda boldyq. Barlyǵy da aqparattyń qate berilgendigin, oǵan ózderiniń qatysy joqtyǵyn alǵa tartady.

Tilshiler qosynyna berilgen derek boıynsha, 2011 jyly Selınograd aýdanyndaǵy Qoıan­dy jáne Talapker aýyldarynda árqaısysy 900 oryndyq eki mektep qurylysyn júrgizý jumys josparyna engiziledi. Kez kelgen is jobalaýdan bastalatyny belgili. Kiltıpan da osy jerden bastalǵany baıqalady. 2009 jyly Kókshetaýdaǵy «Dızaın Sentr» JShS jasaǵan joba boıynsha Qoıandy mektebiniń tolyq smetalyq quny 916,178 mıllıon teńgeni qurasa, As­ta­na qalasyndaǵy «Bıznes Alıans K» JShS-niń Talapker mektebine qatysty jobasynyń smetalyq quny 1692,69 mıllıon teńgege baǵalanǵan. Iаǵnı, mektepterdiń syıymdylyǵy birdeı bolǵanymen, Talapker mektebiniń quny Qoıandydan 776,5 mıllıon teńgege asyp túsken.

Aqmola oblysynyń ákimdigi atalǵan qurylys nysandaryn ońtaılandyrý jáne bıýdjet qarjysyn únemdeý maqsatynda Qurylys jáne turǵyn úı-kommýnaldyq sharýashylyq isteri agenttigine jáne Bilim jáne ǵylym mınıstrligine 2010 jyldyń 23 jeltoqsanynda 05-12/2403 sandy hat joldaıdy. Onda Qoıandy mektebiniń jobasyn Talapker aýylyndaǵy mektepke baılaý (bekitý) usynylǵan. Agenttik pen mınıstrlik tarapynan 2011 jyldyń qańtarynda muny maquldaǵan jaýap alynady. Osynyń nátıjesinde memlekettik saraptama qaıta júrgizilip, Talapker aýylyndaǵy bolashaq mekteptiń smetalyq quny 531,9 mıllıon teńgege tómendegen (burynǵy jobanyń quny 1692,7 mln. teńge bolsa, bekitilgen joba 1160,3 mln. teńge).

Atalǵan aýyldardyń jańa mektepteri 2013 jyldyń qań­tarynda paıdalanýǵa berildi. Son­daı-aq, Qosshy kentiniń balalary bıylǵy oqý jylyn 1200 oryndyq mektepte bastap otyr. Onyń memlekettik saraptama bekitken smetalyq quny – 1433,9 mıllıon teńge. Bylaısha aıtqanda, Talapker mektebiniń iske asyrylǵan joba quny odan 259 mıllıon teńgege arzan. Úkimettiń keńeıtilgen májilisindegi derek Talapker aýylyndaǵy mektepke qatysty alǵashqy joba (1692,69 mln. teńge) negizinde keltirilýi múmkin. Osy faktiniń ózi atqarýshy memlekettik organdardyń iske tııanaqsyzdyǵy men jaýapsyzdyǵyn alǵa tartady. «Qyrsyzdyq Qyrym asyrady» deıdi halqymyz.

Baqbergen AMALBEK,

«Egemen Qazaqstan».

Aqmola oblysy.