Almaty qalasy bilim basqarma basshysynyń orynbasary Qaırat Jumanov qaladaǵy qazirgi bilim berý salasyndaǵy ahýalǵa baılanysty, qashyqtyqtan oqytý máseleleri boıynsha brıfıng ótkizdi, dep habarlaıdy Egemen.kz.
Qaırat Jumanovtyń aıtýynsha, oqý jylynyń bastalǵanyna bir aıdan asa ýaqyt ótti, oqý prosesi bir qalypty júrýde. Qalada 271 myńnan astam oqýshyny qamtıtyn 207 memlekettik mektep jáne 16 myńnan astam oqýshyny qamtıtyn 66 jeke menshik mektep bar.
Qazirgi ýaqytta mektep oqýshylarynyń 96% qashyqtyqtan oqýda. Sonymen qatar, qalanyń 133 (64%) mektebinde 11 840 balany qamtyǵan 923 kezekshi synyptar uıymdastyryldy.
Kezekshi synyptar sanıtarlyq epıdemıologııalyq talaptardy qatań saqtaı otyryp, syıymdylyǵy 15 adamnan aspaıdy.
Qoǵamdyq densaýlyq saqtaý departamenti kúndelikti mektep oqýshylarynyń COVID-19ben aýyrǵany týraly taldaý júrgizip otyr jáne búginde 8 bala esepke tirkeldi, olardyń barlyǵy qashyqtyqtan oqıtyn balalar.
Mektepterdegi oqý prosesin uıymdastyrýda mektep aldynda turǵan basty mindet - balalardyń ómiri men densaýlyǵynyń tolyq qaýipsizdigin qamtamasyz etý.
Qashyqtyqtan oqytýdy sapaly uıymdastyrý maqsatynda Almaty qalasynyń Bilim basqarmasy jergilikti bıýdjetten 42 myń dana jáne Úkimettiń rezervtik qorynan 38,5 myń dana kompıýterlik tehnıka satyp aldy.
Búgingi tańda kompıýterlik tehnıkany qajet etetin oqýshylar 100% qamtamasyz etildi.
Sondaı-aq ınternetke qosylýdy qajet etetin 30 myńnan astam oqýshyǵa SIM kartalar satyp alynyp, taratyldy, al ınternet qol jetimsiz muǵalimderge qajetti sanıtarlyq sharalardy qamtamasyz ete otyryp, mektepterde onlaın sabaqtar ótkizý múmkindigi berildi.
Tamyz aıynda oqý jyly bastalar aldynda Almaty qalasynyń Bilim basqarmasy 15000-nan astam muǵalimge qashyqtyqtan oqytý platformalaryn qoldaný boıynsha trenıng ótkizdi.
Bilim basqarmasy alǵashqy kúnnen bastap qansha mektep ınternet-platformalar arqyly jumys isteıtinine statıstıkalyq taldaý júrgizip keledi.
Oqý jylynyń basynda ata-analardyń suranystaryn únemi qadaǵalap otyrý úshin Bilim basqarmasy jáne barlyq 8 aýdan keri baılanys úshin baılanys ortalyqtary men Telegram botyn, sondaı-aq Instagram jáne Facebook paraqshalaryn ashqan.
Basqarma mamandary óz quzyretindegi suraqtarǵa 8 775 908 55 98 telefony arqyly jaýap berýge daıyn.