Nur-Sultanda «Qazaqstannyń ıpotekalyq kompanııasy» AQ arqyly satyp alý quqyǵymen jalǵa beriletin turǵyn úıge ótinim qabyldaý aıaqtaldy. Nátıjesinde, kezek kútý tiziminen elorda ákimdiginiń turǵyn úı qoryna 4635 ótinish tústi.
«О́tinishter 28 qyrkúıekten 7 qazanǵa deıin zhilfond.kz saıtynda elektrondy formatta qabyldandy. Qabyldaý kezeńiniń nátıjesinde 4635 ótinish kelip tústi. Onyń 2030-y – bilim salasy qyzmetkerlerinen, 723-i – densaýlyq saqtaý, 209-y – mádenıet, 84-i – sport, 668-i – áleýmettik qorǵaý, 613-i – polısııa departamenti, 308-i – tótenshe jaǵdaılar departamentiniń qyzmetkerleri», – dedi brıfıng barysynda Nur-Sultan ákimdiginiń «Turǵyn úı qory» KMM túgendeý jáne esepke alý bólimi basshysy Marta Álnııazova.
Barlyq ótinish berýshiler kelesi sanattar boıynsha kezekte tur: «memlekettik qyzmetshiler, bıýdjettik uıymdar qyzmetkerleri», «kóp balaly analar, kóp balaly otbasylar», «apatty úı», «halyqtyń áleýmettik osal toptary» (múgedek balalardy tárbıelep otyrǵan otbasylar, múgedekterge jáne UOS qatysýshylaryna teńestirilgender, 1 jáne 2 top múgedekteri, sozylmaly aýrýlarmen aýyratyn adamdar, jasy boıynsha zeınetkerler, oralmandar jáne tolyq emes otbasylar).
Búginde kelip túsken ótinishter qaralýda. Baǵdarlamaǵa qatysýshylardy irikteý kezekke qoıylǵan kúnge sáıkes júzege asyrylady. Turǵyn úıdi Nur-Sultan qalasy ákimdiginiń janyndaǵy turǵyn úı komıssııasy bóledi.
Tilendıev dańǵylynda, Sarybulaq boıynda ornalasqan «Jańa Qonys» turǵyn úı kesheninen jáne S.Toraıǵyrov kóshesinde ornalasqan «Zamechatelnyı»turǵyn úı kesheninen 224 páterdi jalǵa berý josparlanǵan.
Áleýmettik turǵyn úı alýshylary aı saıyn jaldaý sharshy metri úshin 1455 teńge tóleýi kerek. Eń kóp jaldaý merzimi – 20 jyl. Ol aıaqtalǵannan keıin turǵyn úı jalǵa alýshynyń menshigine ótedi.
Eske sala keteıik, Qazaqstan Respýblıkasy Úkimetiniń 2019 jylǵy 31 jeltoqsandaǵy №1054 qaýlysymen 2020-2025 jyldarǵa arnalǵan «Nurly jer» turǵyn úı-kommýnaldyq damýynyń memlekettik baǵdarlamasy bekitilgen bolatyn. Onyń baǵyttarynyń biri – «Qazaqstannyń ıpotekalyq kompanııasy» ıpotekalyq uıymy» aksıonerlik qoǵamy arqyly satyp alý quqyǵymen jalǵa beriletin turǵyn úıdi satý.
Bıyl naýryz aıynda Nur-Sultan ákimdigi men «Qazaqstannyń ıpotekalyq kompanııasy» AQ arasynda ákimdikke vedomstvolyq baǵynystaǵy bilim berý, densaýlyq saqtaý, mádenıet, sport jáne áleýmettik qyzmet kórsetý uıymdarynyń, sondaı-aq kommýnaldyq turǵyn úı qorynan turǵyn úıge muqtaj retinde tirkelgen polısııa jáne tótenshe jaǵdaılar departamentteri qyzmetkerleri úshin jalǵa beriletin turǵyn úıdi satý týraly kelisimge qol qoıyldy.