Á.Qasteev atyndaǵy memlekettik óner murajaıy «Jiger» múmkindigi shekteýli jandardyń jastar uıymy» qoǵamdyq birlestigimen birlesip Almaty qalasyndaǵy N.Ostrovskıı atyndaǵy №4 zaǵıp balalarǵa arnalǵan mektep-ınternaty oqýshylarynyń qatysýymen elimizde tuńǵysh ret músin kórmesiniń ınteraktıvti jobasyn júzege asyrdy.
Á.Qasteev atyndaǵy memlekettik óner murajaıy «Jiger» múmkindigi shekteýli jandardyń jastar uıymy» qoǵamdyq birlestigimen birlesip Almaty qalasyndaǵy N.Ostrovskıı atyndaǵy №4 zaǵıp balalarǵa arnalǵan mektep-ınternaty oqýshylarynyń qatysýymen elimizde tuńǵysh ret músin kórmesiniń ınteraktıvti jobasyn júzege asyrdy.
«Qolǵa seziletin beıneler» jobasy – Qazaqstan Respýblıkasynyń Tuńǵysh Prezıdenti Qorynyń IH respýblıkalyq áleýmettik ıdeıalar men jobalar jármeńkesiniń jeńimpazy.
Bul sharanyń basty mindetteriniń biri − múmkindigi shekteýli jandardyń ómirine qoǵamnyń nazaryn aýdartý.
Qazaqstanda zaǵıp jandardy beıneleý ónerimen tanystyrýǵa kómektesetin arnaıy baǵdarlamanyń joqtyǵyn eskerer bolsaq, mundaı ıgi sharanyń qoǵamymyzdyń múmkindigi shekteýli múshelerine keltirer paıdasy men ómirge degen qushtarlyǵyn arttyrary sózsiz. Kórmege qoıylatyn ekspozısııany qarap shyǵýǵa basqa kelýshilerge qaraǵanda olardyń kórý múmkindigi asa shekteýli. Muny tabıǵı shekteýmen ǵana emes, ekspozısııalyq zattardyń kóbisi áınektelgen sórelerge ornalastyrylǵandyqtan da «qoldan jasalǵan shekteýler» qatary zaǵıp jandarǵa árdaıym kedergi keltiretin. Kóne zattar óte názik, osal keledi. Onyń ústine eksponattardyń keıbiri – zaǵıp jandardyń qoly jetpeıtin kartınalar men grafıkalyq týyndylar ekeni anyq. Mine, osyndaı qıyndyqtardy birlesip sheshý maqsatynda atalmysh joba elimizdiń zaǵıp jandaryna jańa múmkindik týdyrý isin belsendi túrde qolǵa alyp otyr.
«Qolǵa seziletin beıneler» jobasynyń negizgi ıdeıasy – múmkinshiligi shekteýli zaǵıp balalardy Qazaqstannyń músindik týyndylaryn dene túısigi arqyly qabyldaýǵa jáne ismer zaǵıp jandarǵa músinsaz arqyly ózderi sıpap túsingen buıymdarynyń keskinin jasaýǵa, óz túsiniginde qabyldaǵan beınelerdi bere bilýge tartý arqyly olardyń ómirine jańa sıpat engizý.
«Sharany ótkizýge sýretshiler Sh.Tólesh, P.Shorohov, Á.Jumabaı jáne B.Beıilhannyń sheberhanalarynan músindik týyndylary ákelip qoıyldy. Bul kórmedegi barlyq eksponattardy qolmen ustaýǵa, olardy jasaǵan materıaldarmen jáne jasalý tehnıkasymen tanysýǵa bolady. Zaǵıp balalardyń músin álemimen baılanysýyna jáne ózderin shyǵarmashylyq jolda kórsetýine múmkindik týdy», deıdi atalmysh joba men kórmeniń jetekshisi Gúlzıra Moldasheva.
Balalardyń jasaǵan jumystary túpnusqa týyndylarmen qatar Á.Qasteev atyndaǵy memlekettik óner murajaıy kórmesine qoıylyp, katalogqa engiziledi. Kórme 25 qarashaǵa deıin jalǵasyp, óz kelýshilerine esigin aıqara ashady.
Qanat ESKENDIR,
«Egemen Qazaqstan».
ALMATY.