Mańǵystaý oblysynda sońǵy kúnderi aty da, álegi de jaman indetpen aýyrǵandar kezdesýde. Bul óńirde karantın sharalaryn engizýge mújbúr etti. Mańǵystaý oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Ǵazız Nadýevtiń aıtýynsha, indet indegen jaǵdaıda karantın talaptary kúsheıtilmek.
О́ńirde naýryz aıynda bastalyp, jaz bastala bere sharyqtap ala jónelgen COVID-19 vırýsyn juqtyrýshylardyń bıyl 27 naýryz ben 12 qazan aralyǵynda shaǵymmen, shaǵymsyzy aralas 3 362 jaǵdaıy tirkelgen bolatyn. 72 naýqas koronavırýs ınfeksııasynan qaıtys bolsa, 3267 adam emdelip shyqty.
– Koronavırýs ınfeksııasymen aýyrǵandardyń ishinen syrttan ákelgender – 6 jaǵdaı, jergilikti 870 jaǵdaı tirkeldi. 647 adam ózderi qaralsa, 223 naýqas skrınıng arqyly anyqtaldy, al juqtyrǵandarmen qarym-qatynasta bolǵandar – 271 jaǵdaı. Infeksııa juqtyrǵandardy qyzmetine, jasyna qaraı saralaıtyn bolsaq, olardyń ishinde medısına qyzmetkerleri – 74, múgedekter – 9, jumyssyzdar – 285, oqýshylar – 43, zeınetkerler – 261, áskerı bólimderden – 18, ken ornyndaǵy «Kaspıan Fýd» tamaqtandyrý mekemesinen – 9, áskerge shaqyrylǵandardan – 4, «Teńizshevroıl» qyzmetkerleri – 35, óndiristik mekemede – 130, memlekettik qyzmetkerler – 24, stýdentter – 21, taǵy basqalar – 167, balabaqsha qyzmetkerleri men muǵalimder – 23, ishki ister qyzmetkerleri – 10, – dedi Ǵ.Nadýev.
Mańǵystaý oblysynda 2020 jyldyń 13 qazanyna deıin PTR tásilimen memlekettik jáne jeke menshik zerthanalarda barlyǵy 120 756 adam tekserilip, onyń ishinde 3 362 pasıent oń nátıje berdi. Ulttyq saraptama ortalyǵynda búgingi tańda 15 myńnan astam test synamasy bar.
Indettiń ótkir juqpalylyǵy men taralý jyldamdyǵy sebepti turǵyndarǵa jıyn-toıdy azaıtý, saqtaný sharalaryn ustaný týraly eskertilgenimen, bul tek Mańǵystaý emes, barsha qazaqstandyqtar úshin oryndalýy qıyn jaǵdaı bolyp otyr. Sanaly túrde saqtaý-saqtaný sharalary men tártip-talaby oryndalmaǵandyqtan, tártipti qadaǵalaýdyń ózi úlken kúshti talap etýde.
Osy oraıda óńirde tamyz aıynan bastap 24 monıtorıng toby qurylyp, búgingi tańda bul top 560 reıdtik jumys júrgizgen. Reıd barysynda 110 kásipkerlik nysanynda buzýshylyqtar anyqtalyp, onyń 110-yna túsinik jumystary júrgizilip, 8 jeke kásipker men 33 jeke tulǵaǵa ákimshilik hattamalar toltyrylǵan.
«Tártipke bas ıgen qul bolmaıdy» dep Baýyrjan Momyshuly aıtqandaı, áli de indetten saqtaný sharalaryn árkim ózinen, otbasynan bastap qolǵa alsa, aýyrtpalyqtan jeńil shyǵýymyzǵa sep bolar edi.
Mańǵystaý oblysy