О́rttiń aldyn alý maqsatynda tótenshe jaǵdaılar departamenti qyzmetkerleri elordanyń jeke sektorynda reıd ótkizýde, dep habarlaıdy Egemen.kz ákimdiktiń resmı saıtyna silteme jasap.
"15 tamyzda biz jeke turǵyn úı sektoryn aralaýdy bastadyq. Shara jyl saıynǵy jylytý maýsymy bastalǵanǵa deıin órttiń aldyn alý maqsatynda ótkiziledi. Turǵyndardy órt qaýipsizdigi erejelerin kúndelikti ómirde saqtaý týraly habardar etemiz. Peshter men qubyrlardy, tútin murjalary men qudyqtardy ýaqytyly jáne durys tazartý, sondaı-aq peshterde kómirqyshqyl gazy shyǵatyn jaryqtar bolmaýyn qadaǵalaýdy eskertemiz. Sondaı-aq ashyq symdarǵa, baılanys qoraptarynyń burandylaryna nazar aýdaramyz. Elektr symdarynyń, uzartqysh symdardyń shamadan tys júktemesine jol bermeý boıynsha túsinikteme beremiz", - dedi Saryarqa aýdany tótenshe jaǵdaılar basqarmasy bastyǵy Qýanysh Toqsarın.
Sonymen qatar jergilikti atqarýshy organdar men TJD qyzmetkerleri azamattardyń úılerine datchıkter ornatýda.
"Tótenshe jaǵdaılar departamentiniń jáne qalalyq shtabtyń ókilderimen birge Kóktal-1 shaǵyn aýdanynda datchıkter ornatyp jatyrmyz. Qazir "Saryarqa" aımaǵynda toǵyzynshy datchık ornatyldy. Shara jyl sońyna deıin jalǵasady", - deıdi Nur-Sultan qalalyq jastar saıasaty máseleleri basqarmasy mamany Ánýar Aqylaev.
"Raqmet, biz qýanyshtymyz. Bul bizge óte paıdaly", - deıdi jeke sektor turǵyny Úmit Jorabaeva.
Aıta keteıik, shara barlyq sanıtarlyq normalarǵa sáıkes ótkiziledi. Jalpy, 15 tamyzdan bastap reıd aıasynda 15 myńǵa jýyq úı qamtyldy. 191 kómirtek totyǵynyń datchıkteri ornatyldy.