Radıotehnıka mamandyǵy boıynsha ofıser-ınjenerlerdi daıyndaıtyn Ortalyq Azııa aýmaǵyndaǵy tuńǵysh ári birden-bir bilim ordasy Radıoelektronıka jáne baılanys áskerı-ınjenerlik ınstıtýtynyń tarıhy – Qazaqstan áskeriniń, otandyq bilim-ǵylym júıesiniń damýymen tyǵyz baılanysty, dep habarlaıdy Egemen.kz
Qurylǵanyna jıyrma jylǵa jýyq merzimde Radıoelektronıka jáne baılanys áskerı-ınjenerlik ınstıtýty elimizdiń Qarýly Kúshteri men basqa da áskerı qurylymdaryna ofıser kadrlardy bes mamandyq boıynsha daıyndap keledi. Búginde bolashaq áskerıler zenıtti zymyrandy, radıotehnıkalyq, avıasııany radıotehnıkamen qamtamasyz etý, baılanys, qarý-jaraqty basqarýdyń avtomattandyrylǵan júıeleriniń ınjenerleri, sondaı-aq aqparattyq qaýipsizdikti qorǵaý salasy boıynsha bilim alyp keledi.
Zamanaýı ofıserlerge qarý-jaraqtyń kóptegen túrleri men radıoelektronıkany jetik bilý jaýapkershiligi júktelgen. Halyqaralyq standarttarǵa saı jaraqtalǵan ınstıtýtta joǵary dárejeli mamandar dáris beredi. Búginde 18 mamannyń ǵylymı dárejesi bar. Onyń 4-ýi ǵylym doktory, 11-i ǵylym kandıdaty, 3 oqytýshy PhD doktory bolyp tabylady. Al 141 adam magıstr dárejesine ıe. Sondaı-aq, 25 áskerı qyzmetshi elimizdegi joǵary oqý oryndarynyń magıstratýrasy men TMD elderiniń adıýnktýrasynda bilim alýda. Áskerı ınstıtýttyń bastyǵy general-maıor Asqar Mustabekov atap ótkenindeı, oqý ornynyń jetistigi árbir áskerı qyzmetshiniń, azamattyq personaldyń qajyrly eńbeginiń jemisi. Olar áskerı bilim berýdi damytýǵa, joǵarǵy oqý ornynyń qalyptasýyna, bolashaq ofıserlerdi daıyndaýǵa laıyqty úles qosyp keledi. Sonyń arqasynda ınstıtýt elimizdiń áskerı joǵarǵy oqý oryndary arasynda jetekshi ujymdardyń biri bolyp sanalady. Elimizdiń Qarýly Kúshteri men basqa da áskerı quralymdary úshin ofıser kadrlaryn daıarlaýda úzdik tájirıbesimen erekshelenýde.
Instıtýt qabyrǵasynda kúndelikti berilip jatqan teorııalyq bilim nátıjeli bolýy úshin praktıkalyq sabaqtar qosa uıymdastyrylady. Oqý aýdıtorııalary men zerthanalary túrli radıotehnıkalyq stendttermen, kompterlik jáne lıngofondy tehnıkalarmen, sımýlıatorlarmen, sondaı-aq jattyǵý keshenderimen jabdyqtalǵan. Kýrsanttar teorııalyq bilimderin ınstıtýttyń oqý ortalyǵynda jetildire túsedi. Bolashaq ofıserler shynaıy jaýyngerlik tehnıkalarda tájirıbeden ótip, radıolokasııalyq beketter men baılanys áskerı tehnıkalarynda qyzmet kórsetedi. Sonymen qatar, kýrsanttar men ofıserler túrli ǵylymı jobalardy zertteý qolǵa alǵan. Iаǵnı, ǵylymı zertteýler júrgizip, áskerı jáne qarý-jaraq tehnıkasyn jetildirýge atsalysýda. Bilikti pedagogtardyń jetekshiligimen kýrsanttar ǵylymı jobalaryn zertteýge usynyp, baıandamalarymen respýblıkalyq jáne halyqaralyq deńgeıdegi ǵylymı konferensııalarǵa qatysyp keledi. Ǵylymı eńbekter ınstıtýt qabyrǵasynda shyǵatyn ǵylymı-tehnıkalyq jýrnalynda jarııalanady. Sondaı-aq, atalǵan ǵylymı baspa betterinde alys jáne jaqyn sheteldik ǵalymdar da óz ǵylymı eńbekterimen bólisip keledi.
Búginde eki myńnan astam leıtenantty qanattandyrǵan ınstıtýtta 340 túlek oqý ozaty atansa, 30 kýrsant "Oqý úzdigi" tósbelgisimen marapattalǵan. Instıtýt maqtan etetin mamandar elimizdiń Qarýly Kúshteriniń qyraǵy kúzetinde.