Kúlli álem jurty taǵatsyzdana kútken jeńil salmaqtaǵy ýkraınalyq Vasılıı Lomachenko men amerıkalyq Teofımo Lopes arasyndaǵy absolıýtti álem chempıony ataǵy úshin tartysty jekpe-jek ótti. 12 raýndqa josparlanǵan aıqasta 23 jastaǵy amerıkalyq jas talant Teofımo Lopes tóreshilerdiń biraýyzdy sheshimimen jeńiske jetti.
Jyl jekpe-jegi dep sanalǵan aıqasta jankúıerler de, boks mamandary da áý basta óz salmaǵynda WBA Super, WBC Franchise jáne WBO nusqalary boıynsha chempıondyq belbeýdiń ıegeri 32 jastaǵy ýkraınalyq boksshynyń jeńisine senimdi boldy. Tipti Teofımo Lopestiń enshisinde IBF tujyrymynyń álem chempıony degen ataǵy bolsa da, Lomachenkodan ońbaı taıaq jeıtinin aıtyp, senimdi sóılegender de jan-jaqtan tabylyp jatty. Onyń ústine áýesqoı boksta bir ǵana jekpe-jeginde jeńilip, qalǵan barlyq aıqasynda qarsylastaryn qoǵadaı japyrǵan Lopeske qaraǵanda tájirıbeli Lomachenko bul aıqastyń sózsiz favorıti edi. О́z zamanynda eki dúrkin álem jáne Olımpııa oıyndarynyń jeńimpazy atanǵan ýkraınalyq kásipqoı boksta da biraz boksshynyń mysyn basyp, qarsylas shaq keltirmeı júrgen-di.
Jekpe-jek aldyndaǵy baspasóz máslıhatynda jýrnalısterdiń suraǵyna jaýap bergen ýkraınalyq boksshy: «Kezdesý barysynda shahmat taktıkasyn qoldanyp, aıqas barysynda judyryqtasý mánerimdi ózgertip otyramyn», degen bolatyn. Biraq barsha jankúıer jekpe-jekte Lomachenkonyń ónerinen erekshe eshteńe baıqaı almady. Altynshy raýndqa deıin tek aıaqpen jumys istep, rıng jaǵalaı júrgennen basqa eshteńe isteı alǵan joq. Tipti birinshi raýndta qarsylasyna birde-bir soqqy jumsaı almady.
Al Lopes qarsylastyń kez kelgen josparyna qarsy birneshe taktıkasy daıyn ekenin aıtty. «Eger Lomachenko sheginip júrip urys salatyn bolsa nemese alǵa qaraı umtylyp, birinshi nómirmen judyryqtassa biz oǵan da daıynbyz», dep jaýap bergen-di. Jekpe-jek bastala salyp tizgindi óz qolyna alǵan Teofımo Lopes raýnd saıyn qarqynyna qarqyn qosyp otyrdy. Ras, jekpe-jektiń birinshi bóliginde kóp soqqy jasaǵanymen, Lomachenkoǵa dóp tıgeni az boldy. Biraq qarsylasqa qaraǵanda belsendi is-qımyl kórsetti. Altynshy raýndtan bastap qana iske kirisken Lomachenko serııalyq soqqylaryn jumsaı bastady. Alaıda Vasılıı rıngte kesh oıanǵanyn ózi de sezgen shyǵar. 12 raýndta eki boksshy bir-birin aıqyn jeńe almaǵan soń, jeńimpaz boksshyny anyqtaý tóreshilerge buıyrdy. Jekpe-jekke baǵa bergen úsh tóreshi amerıkalyq Teofımo Lopestiń jeńisine kúmán keltirmeıtinin málimdep, biraýyzdan onyń jeńiske jetkenin jarııalady.
Jekpe-jekten keıin pikir bildirgen ýkraınalyq boksshy tóreshilerdiń sheshimimen kelispeıtinin jetkizdi. «Shynymdy aıtsam, jekpe-jektiń alǵashqy alty raýndy teń dárejede ótti. Iá, bir-eki raýndta Lopes basym túsken shyǵar, biraq qalǵan alty raýndta men jeńiske jettim dep esepteımin. Sondyqtan tóreshilerdiń sheshimimen kelispeımin. Biraq tóreshi meniń qolymdy kótermegen soń bári beker», deıdi ol. Al jeńil salmaqtaǵy tórt belbeýdi ıyǵyna taqqan Lopes: «Búgin men jeńiske laıyq óner kórsettim jáne men jeńdim», dep qysqa qaıyrdy.
AQSh-ta judyryqtasyp júrgen qazaqstandyq boksshy Madııar Áshkeev Lopeske qaraǵanda Lomachenko jeńiske ábden laıyq boldy, biraq bul jerde saıasat pen bıznes óz áserin tıgizbeı qoımady dep esepteıdi.
«Lomachenko alǵashqy alty raýndta túk isteı almaǵanymen, jekpe-jektiń ekinshi bóliginde kóp soqqy jasap, belsendi boldy. Ádette mundaı teń dárejede ótken jekpe-jekte jeńisti chempıondyq raýndta (10, 11, 12 raýndtar – red.) basym bolǵan boksshyǵa beretin. Biraq bul joly olaı bolmady. Onyń eki sebebi bar dep esepteımin. Birinshisi – Lomachenko ýkraınalyq boksshy bolǵandyqtan, ol AQSh naryǵyna asa qyzyq emes. Onyń jekpe-jekteriniń translıasııa satylymy da az bolady, bıznesmen de jarnamaǵa kóp aqsha tóleı qoımaıdy. Al AQSh, Meksıka, Kanada elderiniń boksshysy kez kelgen jaǵynan árqashan AQSh naryǵynda suranysqa ıe. Ekinshisi – eki boksshynyń da promoýteri bir kisi. Iаǵnı, Bob Arým. Talaı jyldan beri osy salada jumys istep kele jatqan soń ári ol osy bıznestiń ókili bolǵandyqtan, qalaı aqsha tabý kerek ekenin jaqsy biledi. Eger Lomachenko absolıýtti álem chempıony atanyp ketse, ol karerasyn aıaqtaýy da múmkin edi. Sondyqtan chempıondyq ataqty jas ári bolashaǵynan zor úmit kúttiretin Lopeske berdi. Endi taraptar revansh ótkizedi de, taǵy da aqshanyń astynda qalady», deıdi boksshy.
Osylaısha 23 jasynda jeńil salmaqta álemniń absolıýtti chempıony atanǵan Teofımo Lopes mundaı ataqqa qol jetkizgen álemdegi eń jas boksshynyń biri atandy.