Premer-mınıstr Asqar Mamın Úkimet otyrysynda óńirlerde tyńaıtqyshtardy paıdalaný kólemin ulǵaıtýdy tapsyrdy, dep habarlaıdy Egemen.kz
"Agroónerkásip kesheniniń básekege qabilettiligi veterınarııalyq jáne fıtosanıtarııalyq jaǵdaımen tikeleı baılanysty. Bul mańyzy úlken másele. Memleket osy baǵytty damytýǵa asa nazar bólýde. Halyqaralyq epızıotıkalyq bıýronyń derekterine sáıkes, Qazaqstannyń birqatar aýrý túrleri boıynsha qaýipsiz el degen resmı halyqaralyq mártebesi bar. Degenmen keıbir óńirlerde qus tumaýynyń paıda bolýy − baqylaýshy organdardyń, onyń ishinde jedel sharalar qabyldaý jónindegi qyzmetinde birqatar kemshilikteriniń bar ekenin kórsetti. Búgingi tańda qus tumaýyna qatysty jaǵdaı turaqtandy jáne baqylaýda", dedi Asqar Mamın.
Úkimet basshysynyń aıtýynsha, kezekti jaǵdaıǵa monıtorıng júrgizýdi jalǵastyryp, qajet bolǵan kezde aldyn alý sharalaryn jedel qabyldaý kerektigin tapsyrdy.
"Fıtosanıtarııa salasynda júıeli jumys júrgizilip jatyr. Asa qaýipti zııankester men aramshópterge qarsy ýaqtyly qabyldanǵan qorǵaý is-sharalary aýyl sharýashylyǵy daqyldary egistikterine zııan keltirmeýge múmkindik berdi. Bıyldan bastap pestısıdterdi qoldanýǵa sýbsıdııa berý mehanızmi iske qosyldy. Ákimdikter osy máseleni erekshe baqylaýda ustasyn jáne tyńaıtqyshtardy qoldanýdy ulǵaıtýdy qamtamasyz etsin. Tıisti memlekettik qoldaý sharalary kózdelgen", dedi Úkimet basshysy.