Besqaraǵaı aýdanyndaǵy erekshe qorǵalatyn aýmaqta qur aýlaýǵa shyqqan 55 jastaǵy azamat quryqtaldy, dep habarlaıdy Egemen.kz
17 qazanda Besqaraǵaı aýdandyq polısııa bóliminiń tabıǵatty qorǵaý polısııa tobynyń qyzmetkerleri patrýldeý kezinde erekshe qorǵalatyn tabıǵı aýmaqta zańsyz qur aýlaý faktisin anyqtaǵan. Polıseıler qaskóıdi der kezinde ustaǵandyqtan, ol tabıǵatqa zııan keltirip úlgermedi.
– Jedel aldyn alý sharalary kezinde qur aýlaýǵa shyqqan 55 jastaǵy Besqaraǵaı aýdanynyń turǵynynan patrondary men 12-shi kalıbrli uńǵyly ańshy myltyǵy alyndy, – dedi oblystyq Polısııa departamentiniń bastyǵy Saǵat Mádıev.
Brakonerge qatysty Ákimshilik quqyq buzýshylyqtyń 382 baby, 3 bóligi boıynsha hattama toltyryldy.
"Erekshe qorǵalatyn tabıǵı aýmaqtar týraly" zańǵa sáıkes "Semeı ormany" aýmaǵynda ań aýlaýǵa tyıym salynǵan.