Qostanaı oblysynda óriste júrgen jekemenshiktiń sıyryn atyp, teń bólip alǵan ańshylar ustaldy. 2020 jylǵy 8 qazanda Naýyrzym aýdanynyń polısııa bólimine Dámdi aýylynan 15 shaqyrym jerdegi jaıylymda jergilikti turǵynǵa tıesili iri qaranyń terisi tabylǵany týraly habar kelip túsken. Shyǵyn kólemi – 300 myń teńge.
Shaǵym boıynsha mán-jaıdy anyqtaý barysynda baqtashy polıseılerge oqıǵa bolǵan kúni sur tústi djıp kóligin baıqap qalǵanyn aıtady. Izdestirý sharalarynyń nátıjesinde iri qarany atyp alǵan Qarasý aýdanynyń eki turǵyny tabyldy. Iz sýytyp úlgermegen kúdiktilerdi polıseıler Oktıabr kentinde óz úılerinde otyrǵan jerinen ustady.
Kúdiktilerdiń aıtýynsha, olar sol kúni tańǵy saǵat 10:00-de "Land Cruiser Prado" avtokóligin minip ańǵa shyqqan, biraq qanjyǵa maılanbaıdy. Sodan qaıtar jolda saǵat 17:00 shamasynda ańshylar Naýyrzym aýdanyna qarasty Dámdi aýylynyń mańynda qaraýsyz jaıylyp júrgen 7-8 bas sıyrdy kóredi. Oljasyz qaıtqysy kelmegen ańshylar jaqyn mańda eshkim joq ekenine kóz jetkizip, tabynnyń ishinen bir sıyrdy atyp, sol jerde soıyp alǵan.
"Mal ıesi polısııaǵa dereý habarlaǵan soń, qylmysty izin sýytpaı ashýǵa múmkindik týdy. Urlanǵan et ıesine qaıtaryldy. Qazir Qylmystyq kodekstiń "Mal urlyǵy" babyboıynsha tergeý sharalary júrip jatyr", - dedi Naýyrzym aýdandyq polısııa bóliminiń bastyǵy Oral Baımurzın.
Qostanaı oblysy
Naýyrzym aýdany