Aldaǵy Parlament Májilisi jáne Máslıhat depýtattaryn birikken saılaý kompanııasyna shamamen shyǵyndar smetasy 15,3 mıllıard teńge bolady. Bul týraly Ortalyq saılaý komıssııasynyń hatshysy Sábıla Mustafına málimdedi, dep habarlaıdy Egemen.kz
Ortalyq saılaý komıssııasynyń hatshysy Parlament Májilisiniń buǵan deıingi 2016 jylǵy saılaý kampanııalarymen jáne 2019 jylǵy prezıdent saılaýymen salystyrǵanda aldaǵy kampanııadaǵy shyǵyndar kóbeıetindigin qosa ketti.
"Birinshi kezekte, josparlanǵan shyǵynnyń kóbeıýi – Saılaý komıssııasy músheleriniń eńbekaqysyn tóleý shyǵystarynyń ulǵaıýyna baılanysty jalaqynyń tómen kórsetkishin kóterý.
Ekinshiden, halyq sanynyń tabıǵı jolmen kóbeıýine baılanysty qaıta qurylǵan 86 saılaý ýchaskesiniń qurylýyna shyǵyndar kóbeıdi. Onyń quramynda komıssııanyń 600-den asa múshesi bar.
Úshinshiden, taýarlar, jumystar men qyzmetter, sondaı-aq pandemııa jaǵdaıynda saılaý ótkizýge baılanysty mindetti shyǵyndar baǵasynyń ınflıasııasy. Kampanııa eki bıýdjet jyly aıasynda ótetinin atap ótý kerek. Sondyqtan 2021 jylǵy shyǵyndar – 4,5 mıllıard teńge "2021-2023 jyldarǵa arnalǵan respýblıkalyq bıýdjet" týraly zań jobasynda kózdelgen jáne bul soma barlyq deńgeıdegi saılaý komıssııasy músheleriniń jalaqysyn tóleýge jumsalady.
Sonda jalpy Parlament Májilisi jáne Máslıhat depýtattaryn birikken saılaý kampanııasyna shamamen shyǵyndar smetasy 15,3 mıllıard teńge bolady. Bul bıýdjet qarjysyn tıimdi paıdalanýda utymdy sheshim bolyp otyr. Sebebi eki bólek saılaý ótkizgende shyǵyn 25 mıllıard teńge bolatyn edi", dedi OSK hatshysy Sábıla Mustafına.
Eske sala keteıik, Memleket basshysy: "Aldaǵy saılaý konstıtýsııalyq merzimge sáıkes, 2021 jyldyń 10 qańtarynda ótedi. Barlyq saıası partııalardyń bul saılaý naýqanyna qatysýǵa daıyndalýyna, saılaý aldyndaǵy platformasyn ázirleýine, partııalyq ınfraqurylymdardy jetildirýine ýaqyty jetkilikti boldy. Ortalyq saılaý komıssııasy men Bas prokýratýra saılaýdyń zańdylyǵyn, ashyqtyǵyn jáne ádildigin saqtaý úshin turaqty baqylaý júrgizip otyrady", dep aıtyp ótken edi.