Qazaqstan Ulttyq Olımpıadalyq komıteti men kundelik.kz saıty mektep oqýshylary arasynda dene shynyqtyrý jáne salaýatty ómir saltyn nasıhattaýǵa baǵyttalǵan birlesken jobanyń bastalǵany týraly málimdeıdi dep jazady Olympic.kz.
Strategııalyq yntymaqtastyq týraly kelisimge Qazaqstan Ulttyq Olımpıadalyq Komıtetiniń Bas hatshysy Andreı Krıýkov pen «Kúndelik» JShS bas dırektory Muhtar Ilııasov qol qoıdy.
Qashyqtan bilim berý júıesi stýdentter men olardyń ata-analarynyń qalypty ómirine aınaldy. Jobanyń negizgi ıdeıasy da búkil álemdegi qazirgi jaǵdaımen tikeleı baılanysty. Sondaı-aq dene shynyqtyrý sabaqtary da onlaın keńistikke kóshirildi.
«Qazirgi jaǵdaıdy eskere otyryp, ózimizdiń de, balalarymyzdyń da densaýlyǵyn saqtaý óte mańyzdy. Qashyqtan oqytý barysynda oqýshylar kúndelikti ómirin monıtor aldynda ótkizedi. Fızıkalyq belsendilik azaıǵandyqtan balanyń tolyq damýyna áser etedi. Sondyqtan, Qazaqstannyń Ulttyq Olımpıadalyq komıteti jáne bizdiń olımpıadashylar dene shynyqtyrý sabaǵyn ótkizýge praktıkalyq kómek usynady. Aıta keterligi, bul shyn máninde kez-kelgen sportshynyń mansabyndaǵy alǵashqy qadam bolyp otyr. Biz chempıon bolý balalyq shaqtan bastalady dep jıi aıtamyz. Sondyqtan balalardyń densaýlyǵyn jan-jaqty damytýǵa baǵyttalǵan osyndaı jobany bastaý týraly sheshim óte mańyzdy qadam bolyp tabylady. Bizdiń bastamamyzdy qoldaǵany úshin kundelik.kz saıtyna alǵys aıtamyz jáne birlesken joba tek mektep oqýshylary arasynda ǵana emes, sonymen birge búkil eldegi dene shynyqtyrý muǵalimderi arasynda oń kózqarasqa ıe bolady dep senemiz», deıdi Qazaqstan Ulttyq Olımpıada Komıtetiniń Bas hatshysy Andreı Krıýkov.
Jobada Qazaqstannyń úzdik sportshylarynyń qatysýymen daıyndalǵan dene shynyqtyrý boıynsha beınematerıaldar bar.
Arnaıy sabaqtar ázirleý úshin bilim berý júıesinde kópjyldyq tájirıbesi bar kásibı ádiskerler, dene shynyqtyrý muǵalimderi, orta mektepterde balalarmen tikeleı jumys isteıtin dál osy dene shynyqtyrý boıynsha muǵalimder tartyldy.
«Biz Qazaqstan Respýblıkasynyń Ulttyq Olımpıadalyq komıtetimen strategııalyq seriktestikke óte rızamyz jáne bizdiń elimizde dene shynyqtyrýdy jáne sporttyq medıa-kontentti keńinen taratý úshin bar kúsh-jigerimizdi salamyz. Qazaqstan bizdiń sportshylardyń álemdik arenalardaǵy jetistikterimen maqtan tutady jáne bizdiń oıymyzsha, bul aqparatty jas urpaqqa – Qazaqstannyń barlyq mektepteriniń oqýshylaryna zamanaýı kreatıvti tehnologııalar arqyly jetkizý óte mańyzdy. UOK-pen birlese otyryp, biz árbir jas azamat úshin dene shynyqtyrýdy damytýdyń mańyzdylyǵyna arnalǵan dene shynyqtyrý sabaǵyn jáne ártúrli sport túrlerindegi mamandandyrylǵan jattyǵýlardy oqytýdyń zamanaýı ádisterine arnalǵan qazaq jáne orys tilderinde beıne sabaqtar toptamasyn shyǵarýdy qolǵa aldyq. Joba barysynda qatysýshylar qurmetti chempıondarymyzdyń ómir joly men jetistikterinen habardar bolady», deıdi «Kúndelik» JShS bas dırektory Muhtar Ilııasov.
Birinshi kezeń ekinshi akademııalyq toqsannan bastalady. Osy kezeńde jetekshi qazaqstandyq sportshylar tájirıbeli muǵalimderdiń nusqaýlyǵymen balalardyń jas jáne genderlik erekshelikterin eskere otyryp, daıyndyq sabaqtarynyń serııasyn usynady.
Kelesi kezeń oqý jylynyń úshinshi jáne tórtinshi toqsanyna josparlanǵan. Bul kezeńde ártúrli olımpıadalyq sport túrlerindegi mamandandyrylǵan jattyǵýlarǵa basa nazar aýdarylady.
Árıne, dańqty sportshylar balalarǵa jaqsy úlgi bola alady. Sondaı-aq, ataqty sportshylar ózderiniń osy jobaǵa qatysýǵa óte yntaly boldy. Olımpıadashylar balalarǵa qashyqtyqtan oqytý kezinde belsendi bolýǵa, dene shynyqtyrý muǵalimderine praktıkalyq kómek kórsetýge jáne qazaqstandyq sporttyń bolashaǵyna úles qosýǵa árdaıym daıyn.
«Bul Qazaqstan Ulttyq Olımpıadalyq Komıtetiniń bastamasymen qolǵa alynǵan óte keremet joba. Biz, sportshylar, osy jobaǵa qatysýǵa qýanyshtymyz. Qazirgi jaǵdaıda sporttyń róli, onyń bizdiń ómirimizge áseri artyp keledi. Bizdiń balalar qashyqtan oqıdy, gadjettermen kóp ýaqyt ótkizedi. Osy jobanyń arqasynda biz de olardyń ınternettegi ýaqyty paıdaly bolady dep úmittenemiz. Olımpıadalyq komıtettiń dene shynyqtyrý boıynsha qolǵa alǵan sabaǵy osyǵan kómektesedi», dedi grek-rım kúresiniń balýany Almat Kebispaev.
Qazaqstan Ulttyq Olımpıadalyq komıteti joba aıasynda balalardy osy sabaqtarǵa qyzyqtyryp, yntalandyrý úshin ár túrli jarystar men is-sharalarǵa úlken kóńil bóledi. Mektep oqýshylary Qazaqstannyń olımpıadalyq otbasynyń biregeı syılyqtaryn utyp alý múmkindigine ıe bolady. Sonymen qatar, aǵymdaǵy oqý jylynda eldiń jetekshi sportshylarynyń vebınarlary ótkizilip, olar ózderiniń jetistikke jetý syrlary týraly áńgimelesedi. Barlyq beıne sabaqtar kundelik.kz bilim berý platformasynda jáne Qazaqstan Ulttyq Olımpıada Komıtetiniń Youtube kanalynda qol jetimdi bolady.
Qazaqstan Respýblıkasynyń Ulttyq Olımpıadalyq komıteti Olımpıadalyq hartııaǵa sáıkes Olımpıadalyq qozǵalysty damytý jáne qorǵaý, Qazaqstan aýmaǵynda qurmet, dostyq olımpıadalyq qundylyqtar nasıhattaý maqsatynda quryldy. Ulttyq olımpıadalyq komıtettiń taǵy bir maqsaty - joǵary dárejedegi qazaqstandyq sportshylardy Olımpıada oıyndaryna qatysýǵa daıyndaý arqyly Qazaqstan Respýblıkasynda sport túrlerin qarqyndy damytý.
Kundelik.kz – muǵalimderge, oqýshylarǵa, ata-analarǵa, bilim berý uıymdarynyń ákimshiligine, sondaı-aq bilim berý organdarynyń ókilderine arnalǵan biryńǵaı elektrondyq bilim berý ortasy. Bilim berý uıymdary úshin elektrondyq qujat aınalymynyń múmkindikterin jáne bilim berý prosesiniń barlyq qatysýshylary, atap aıtqanda, muǵalimder, ata-analar men oqýshylar arasynda áleýmettik jeli quraldary biriktirilgen avtomattandyrylǵan bilim berý aqparattyq júıesi.