Agroónerkásiptik keshen jónindegi konsýltatıvtik komıtettiń qatysýshylary mal sharýashylyǵy jáne tuqym sharýashylyǵy ónimderiniń aınalysy salasyndaǵy birizdendirý máselelerin, Eýrazııalyq ekonomıkalyq odaqta birlesken ǵylymı-zertteý jáne tájirıbelik-konstrýktorlyq jumystar (ǴZTKJ) júrgizýdiń basymdyqtaryn, sondaı-aq halyqaralyq yntymaqtastyqty damytýdyń jańa baǵyttaryn talqylady. Otyrysta Eýrazııalyq ekonomıkalyq komıssııanyń О́nerkásip jáne agroónerkásiptik keshen jónindegi mınıstri Artak Kamalıannyń tóraǵalyǵymen ótti, dep jazady Egemen.kz EEK taratqan derekterge silteme jasap.
«COVID-19 pandemııasy jaǵdaıynda agroónerkásiptik keshenniń teńdestirilgen damýyn qamtamasyz etý maqsatynda EAEO elderiniń kelisilgen agroónerkásiptik saıasattyń negizgi baǵyttary boıynsha yntymaqtastyǵyn tereńdetý, sondaı-aq ózara saýdadaǵy kez kelgen kedergini joıýmen júıeli jumys isteý mańyzdy», – dep atap kórsetti EEK mınıstri.
Otyrysqa qatysýshylar Komıssııa Alqasynyń «Aýyl sharýashylyǵy janýarlaryn jáne olardyń ónimin (materıalyn) asyl tuqymdy ónimge jatqyzý kezindegi tásildemelerdi birizdendirý týraly» usynymynyń jobasyn maquldady. Usynymdy iske asyrý ákelinetin asyl tuqymdyq ónimniń joǵary sapasyn qamtamasyz etýge ári oǵan jáne ilespe qujattarǵa qoıylatyn talaptardy birizdendirýge múmkindik beredi. EAEO elderine Odaq memleketteriniń aýmaǵyna úshinshi elderden ákelinetin asyl tuqymdy ónim sapasyna baqylaýdy júzege asyrýǵa, sondaı-aq asyl tuqymdy janýarlar men olardyń ónimin seleksııalyq-asyldandyrý jumysynda odan ári paıdalaný úshin qajetti málimetterdi qamtıtyn qujattarmen súıemeldenetin jaǵdaılardy saqtaýdy qamtamasyz etýge usynym jasalady.
Agroónerkásiptik keshen jónindegi konsýltatıvtik komıtet múshe memleketterdiń aýyl sharýashylyǵy ósimdikteriniń sorttaryn synaý jáne tuqym sharýashylyǵy salalaryndaǵy zańnamasyn birizdendirýge baǵyttalǵan sharalar tizbesi jobasyn maquldady. Kózdelgen sharalardy iske asyrý ulttyq zańnamadaǵy tuqymnyń ózara saýdasyna áser etetin aıyrmashylyqtardy joıýǵa, ishki naryqtaǵy ákimshilik tosqaýyldardy azaıtýǵa múmkindik beredi. Qujatty Joǵary Eýrazııalyq ekonomıkalyq keńestiń bekitýi josparlanyp otyr.
Taraptardyń ókilderi AО́K salasyndaǵy birlesken ǴZTKJ tizbesiniń jobasyn maquldady. Qujat 2021-2025 jyldarǵa arnap qalyptastyrylǵan jáne ósimdik sharýashylyǵy, mal sharýashylyǵy, melıorasııa, tamaq ónerkásibi ári agroónerkásiptik keshen ekonomıkasy salasyndaǵy 27 taqyrypty kiristiredi. Zertteýler ǵylymı-tehnıkalyq progrestiń ozyq jetistikteri negizinde serpilisti ónimder men tehnologııalar ázirleýdi baǵamdaıdy.
Agroónerkásiptik keshenniń básekege qabilettiligin arttyrý úshin taraptardyń birlesken kúsh-jigerimen aýyl sharýashylyǵy daqyldarynyń beıimdelgen jáne ónimdiligi joǵary sorttaryn jasaý, yqtııatty egin sharýashylyǵyn jáne topyraqtyń qunarlylyǵyn qalpyna keltirý júıesin damytý, ósimdik sharýashylyǵy men mal sharýashylyǵynda bıotehnologııalar ázirleý, sondaı-aq geoaqparattyq tehnologııalardy qoldana otyryp, jerdiń melıoratıvtik jaı-kúıin baǵalaý júıesin daıyndaý josparlanýda. Ekonomıka salasynda ǴZTKJ sharýashylyq júrgizýdiń shaǵyn nysandarynyń básekege qabilettiligin arttyrý, aýyl sharýashylyǵynda qyzmetter kórsetý sektoryn jáne sıfrlyq tehnologııalardy damytý máselelerin sóz etedi
AО́K jónindegi konsýltatıvtik komıtettiń qatysýshylary EEK Alqasy usynymynyń tıisti jobasyn maquldaı otyryp, EAEO-da túrlendirilgen krahmaldar alýdyń tıimdi ımport amastyrýshy tehnologııalaryn qurý kezindegi yntymaqtastyqty damytý máselesine derbes nazar aýdardy.
Qujat tamaq jáne tehnıkalyq maqsattar úshin túrlendirilgen krahmaldar óndirisiniń ekologııalyq qaýipsiz tehnologııalaryn ázirleý maqsatynda birlesken is-sharalardy iske asyrýdy, sondaı-aq naryqty zertteý jáne patenttik izdeý nátıjeleri negizinde krahmaldy túrlendirý úshin normatıvtik qujattamany jáne arnaýly jabdyqty kózdeıdi. Qorytyndysynda qosylǵan quny joǵary tamaqqa arnalǵan jáne tehnıkalyq maqsattaǵy jańa ónerkásip ónimderin alý kútilýde.
Ǵylymı-ınnovasııalyq yntymaqtastyqty damytý baǵytyndaǵy qabyldanyp jatqan qadamdar agroónerkásiptik keshenniń tehnologııalyq básekege qabilettiligin jáne Odaq elderiniń ǵylymı-zertteý áleýetin paıdalaný tıimdiligin arttyrýǵa yqpal etetin bolady.
AО́K jónindegi komıtet músheleri Eýrazııalyq ekonomıkalyq komıssııa men Islam azyq-túlik qaýipsizdigi uıymynyń, Halyqaralyq qant uıymynyń jáne Halyqaralyq astyq keńesiniń arasyndaǵy ózara túsinistik týraly memorandýmdar jobasyn maquldady. Bul uıymdar bolashaqta aqparat, tájirıbe jáne bilim almasady, birlesken zertteýler, konsýltasııalar men dóńgelek ústelder ótkizedi, birlesken baıandamalar, taldamaly jáne basqa sholýlar daıyndaıdy dep baǵamdalýda.