Shyǵys Qazaqstanda qatty turmystyq qaldyqtardy bólek jınaýdyń ınfraqurylymyn damytý jónindegi joba tanystyryldy. Keler jyly Semeı men О́skemende zamanaýı suryptaý jelisin iske qosý kózdelip otyr. Sondaı-aq qos qalaǵa qoqys tasıtyn kólikter satyp alý, qaldyqty bólek tastaýǵa arnalǵan konteınerler ornatý josparlanǵan.
Oblys ortalyǵy men Semeıde qaldyqty úsh fraksııada jınaý júzege asyrylatyn bolady: «jeńil» qaıta óńdeletin qaıtalama shıkizat (plastık, qaǵaz, metall), «aýyr» – bul shyny jáne «dymqyl» qaıta óńdelmeıtin qaldyqtar (tamaq qaldyqtary jáne t.b.)
Atalǵan jobany júzege asyrýǵa 3,9 mlrd teńge shamasynda qarajat bólindi. О́KM operatory tarapynan О́skemen qalasy úshin makýlatýra men plastıkti bólek jınaýǵa arnalǵan sary tústi 760 plastık konteıner jáne shyny qaldyqtaryna arnalǵan qońyraý úlgisindegi 514 kók tústi konteıner satyp alynyp, ákimdikke beriledi. Semeıde qaıtalama shıkizatty jınaýǵa arnalǵan 1 050 torly jáne shyny ydysqa arnalǵan 532 konteıner ornatý josparlanýda. Sonymen qatar О́KM operatory Shyǵys Qazaqstannyń eki qalasy úshin 12 birlik arnaıy tehnıkany satyp alýǵa da qarajat bóldi.
Semeı men О́skemen qalalarynda qatty turmystyq qaldyqtardy bólek jınaýdyń ınfraqurylymyn uıymdastyrý boıynsha jumystar 2021 jyly jalpy óndiristik qýaty jylyna 200 myń tonna qatty turmystyq qaldyqtardy suryptaıtyn eki jańa qoqys suryptaý jelisin iske qosýdan bastalady. Qazirgi ýaqytta О́KM operatory qajetti óndiristik jabdyqtardy satyp alý rásimin júrgizýde.
Jergilikti bıýdjettiń jáne qoqys shyǵaratyn uıym qarajaty esebinen tamaq qaldyqtaryn jınaýǵa arnalǵan konteınerlerdi jańartý, qabyldaý pýnktterin ornatý jáne suryptaý jelisin ornalastyrýǵa arnalǵan ǵımarat salý jaǵy qarastyrylady. Bul keshendi jumys óńirdegi qaldyqtardy qaıta óńdeý kórsetkishin ulǵaıtýǵa, qatty turmystyq qaldyqtardy bólek jınaý ınfraqurylymyn damytýǵa, sondaı-aq jańa jumys oryndaryn ashýǵa múmkindik beredi dep kútilýde. Jergilikti atqarýshy organ óz kezeginde qaldyq óńdeý kólemin 2021 jyly 30%-ǵa deıin jetkizýdi qolǵa alady.
Atalǵan jobany júzege asyrýǵa arnalǵan keńeıtilgen otyrys osy jyldyń qarasha aıynda ótedi dep josparlanyp otyr. Oǵan Shyǵys Qazaqstan oblysy ákimdigi, Ekologııa, geologııa jáne tabıǵı resýrstar mınıstrligi jáne О́KM operatory qatysatyn bolady.
Aıta ketelik, Shyǵys Qazaqstan oblysynda 430 polıgon bar. Onyń ishindegi 32 polıgon ekologııalyq jáne sanıtarlyq talaptar men normalarǵa saı keledi (ruqsat berý qujattamasy bar). Ruqsat etilmegen qoqystardy joıý úshin jergilikti bıýdjet jyl saıyn 10 mln teńgeden astam qarajat shyǵarady.