Memleket basshysy Qasym-Jomart Toqaevtyń bıylǵy Joldaýynda aıtylǵan mindetter aımaqtaǵy jumysty shırata túskendeı. Ásirese, memlekettik baǵdarlamalardyń iske asýyna jańasha serpin berilip, istiń nátıjesi kórine bastady. Sonyń bir kórinisi baspana kezeginde turǵan adamdardy turǵyn úımen qamtý isinen baıqalýda.
Memleket basshysy Qasym-Jomart Toqaev Qazaqstan halqyna arnaǵan «Jańa jaǵdaıdaǵy Qazaqstan: is-qımyl kezeńi» atty Joldaýynda: «Azamattardyń áleýmettik ál-aýqaty, eń aldymen, baspana máselesine tikeleı baılanysty. Naryq jaǵdaıynda turǵyn úıdiń qoljetimdiligi adamdardyń tabysyna jáne osy mindetti ózdiginen sheshe alý qabiletine oraı júzege asady. Bıyldan bastap «5-10-25» baǵdarlamasy júzege asyrylýda. Oǵan 390 mlrd teńge bólindi. Úkimet osy baǵdarlamanyń júzege asyrylý barysyn únemi qadaǵalap otyrýy kerek» degen bolatyn.
Qazir kezekte turǵan adamdardyń baspana máselesin tezirek sheshý joly da aıqyndala túskendeı. Mysaly, Almaty oblysynda bıylǵy maýsym aıynan bastap «Nurly jer» baǵdarlamasynyń jańa baǵyty – «Shańyraq 5-10-20» baǵyty iske asyp jatyr. Jalpy, bul baǵdarlama 1986-2017 jyldar aralyǵynda turǵyn úı kezeginde turǵan azamattarǵa qoljetimdi nesıe berýdi jolǵa qoıýymen erekshelenedi. Búginde osy sanatqa kiretin 39 809 jetisýlyq baspana kezeginde tur eken. Al olardy baspanamen qamtý úshin respýblıkalyq bıýdjetten turǵyn úı qurylysyna 6,4 mlrd teńge bólingen. Bastalǵan istiń alǵashqy nátıjesi de kórine bastady. Máselen, osy baǵdarlama arqyly bıyl 476 adam óz shańyraǵynda qonys toıyn toılaıdy.
Jalpy, óńir halqyn qoljetimdi turǵyn úımen qamtamasyz etý jónindegi memlekettik baǵdarlamalardyń ishinde basymdyqqa ıe bolyp otyrǵan da osy «Nurly jer» baǵdarlamasy. Oblysta baǵdarlama aıasynda 119 jobany júzege asyrýǵa 40,8 mlrd teńge qarastyrylǵan bolsa, onyń 30 mlrd teńgeni quraıtyn 52 jobasy tek qana turǵyn úı qurylysyn qamtymaq. Al bıyl «Nurly jerdiń» sharapatymen 938,8 myń sharshy metr turǵyn úı, onyń ishinde bıýdjet qarajaty esebinen 136 myń sharshy metr úı paıdalanýǵa beriledi. Demek, 519 turǵyn úıdegi 1 714 páter ıelerin tabady degen sóz. Jyl sońyna deıin «Nurly jer» baǵdarlamasynyń barlyq baǵyttary boıynsha 2 843 otbasy baspanaly bolady degen úmit bar. Onyń ishinde 725 kópbalaly otbasynyń turǵyn úı máselesi tolyqtaı sheshiledi. Áleýmettik qoldaý kartasy aıasynda bul otbasylardyń barlyǵy turǵyn úı sertıfıkattaryna ıe bolady. Osy maqsatqa oblystyq bıýdjetten 500 mln teńge bólingen bolatyn.
– «Nurly jer» baǵdarlamasy degende, Almaty oblysynda turǵyn úıler men ınjenerlik ınfraqurylym qurylystaryna 39,8 mlrd teńge bólingenin aıtýǵa bolady. Búginde aımaqta barlyǵy 1 630 páterlik 532 turǵyn úı salynýda. Qazirdiń ózinde 640 páterlik 32 úı Taldyqorǵan, Qapshaǵaı qalalary men Ile, Qarasaı, Jambyl, Talǵar jáne Qaratal aýdandarynda paıdalanýǵa berildi. Odan bólek jekemenshik qurylys kompanııalary Taldyqorǵan, Qapshaǵaı qalalary men Ile, Qarasaı, Jambyl, Kóksý aýdandarynda 1 163 páterli 34 úıdiń qurylysyn júrgizip jatyr, – deıdi oblys ákimi Amandyq Batalov.
Sondaı-aq Jetisýda ótken 9 aıda qurylysy aıaqtalǵan 365 baspana «7-20-25» baǵdarlamasy boıynsha óz ıesin tapsa, «Baqytty otbasy» baǵdarlamasymen 511 otbasy taǵy turǵyn úıli boldy. Munan bólek, nesıelik turǵyn úı qurylysy boıynsha jalpy aýdany 51,4 myń sharshy metr bolatyn turǵyn úı qurylysy bastalǵan. Buǵan 10,4 mlrd teńge qarjy bólinip, nátıjesinde 648 páterlik 51 záýlim úı boı kótermek. Aıtpaqshy, nesıelik turǵyn úı baǵdarlamasyna qatysýdy kózdeıtin turǵyndar sany oblystyń megapolıspen shektesetin aýdandarynda kóbeıip otyr eken. Suranysqa sáıkes, bıyl Almaty aglomerasııasynyń shetkeri bóliginde jalpy aýdany 52,5 myń sharshy metr bolatyn qurylys bastalǵan. Nátıjesinde, 740 páterden turatyn 88 úı salynady. Bul maqsatqa 7,1 mlrd teńge qarastyrylsa, onyń 6,2 mlrd teńgesin oblıgasııalar quraǵan, al birlesip qarjylandyrý quny 9 mlrd teńgege jetip otyr.
Almaty oblysy