Búgin Nur-Sultan qalasy ákiminiń orynbasary Baqtııar Máken men iri saýda ortalyqtary men bazarlardyń basshylary arasynda kezdesý ótti. Qalanyń bas sanıtarlyq dárigeri Janna Pirálıeva óz sózinde atap ótkendeı, elordada indet juqtyrý jaǵdaılary jıilegeni baıqalady. Bul ShOB ókilderi men azamattardyń karantın tártibin óreskel buzýymen baılanysty, dep habarlaıdy Egemen.kz
"Profılaktıkalyq jumystarǵa qaramastan, kásipkerlik sýbektileri karantın tártibin buzýda, buqaralyq is-sharalar ótkizilýde, mekemelerdiń jumys kestesi buzylǵan. Sonymen qatar qalada aýrý sany artyp keledi. Bul degenimiz biz jasyl aımaqtan alshaqtaımyz. Aýrý jaǵdaılary mektep jasyndaǵy jáne bir jasqa deıingi balalar arasynda da tirkelýde", dedi Janna Pirálıeva.
Negizgi qaýipsizdik erejelerin elemeý COVID-19 ekinshi tolqynyna ákelýi múmkin. ShOB ókilderi men qala turǵyndary sanıtarlyq normalardyń saqtalýyna úlken jaýapkershilikpen qaraýy kerek.
"Ár aımaq óz deńgeıinde sheshim qabyldaıdy. Biz sondaı-aq bıznestiń jumys istegenin qalaımyz, biz bul jumys, tabys jáne ekonomıka ekenin túsinemiz. Biraq kásipkerler óz tarapynan talaptardy oryndaýy kerek. Keıbir saýda ortalyqtary maska taǵý tártibin saqtamaıdy jáne temperatýrany teksermeıdi. Qabyldanyp jatqan sharalarǵa túsinistik tanytýdy suraımyz, bizdiń ortaq mindetimiz, eń aldymen, aýrýdyń qaıta órýshiniń aldyn alý", dedi Nur-Sultan qalasy ákiminiń orynbasary Baqtııar Máken.
Jıyn sońynda saýda ortalyqtarynyń demalys kúnderindegi jumysyn qaıta qalpyna keltirý qaladaǵy epıdemııalyq jaǵdaıǵa jáne ShOB-tyń sanıtarlyq normalardy saqtaýyna baılanysty bolatyny aıtyldy.
Demalys kúnderi saýda oıyn-saýyq ortalyqtarynyń jumysyn qalpyna keltirý tolyǵymen nysandardyń barlyq sanıtarlyq normalardy saqtaýdaǵy daıyndyǵyna baılanysty. Árbir azamattyń jaýapkershiligi epıdemııalyq jaǵdaıǵa áser etedi, sondyqtan barlyq elordalyqtardy karantın sharalaryn qatań saqtaýǵa shaqyramyz.