Qazaqstanda 15 naýryz kúni keshki saǵat 20:00-de barlyq referendým ýchaskeleri jabyldy. Endi ýchaskelik komıssııalar bıýlletenderdi sanaýǵa kirisedi, al referendýmnyń resmı nátıjeleri 2026 jylǵy 21 naýryzǵa deıin jarııalanady, dep habarlaıdy Egemen.kz.
2026 jylǵy 15 naýryzda tańǵy saǵat 07:00-de eldiń barlyq óńirinde daýys berýge arnalǵan 10 388 ýchaske ashyldy. Olar 13 saǵat boıy jumys istep, keshki saǵat 20:00-de jabyldy.
Endi ýchaskelik komıssııalar daýystardy sanaýǵa kirisedi. Odan keıin bıýlletender joǵary turǵan aýmaqtyq saılaý komıssııalaryna beriledi. Sol jerden olar Ortalyq referendým komıssııasyna (ORK) joldanady. Referendým nátıjeleri 2026 jylǵy 21 naýryzǵa deıin jarııalanady.
Saǵat 10:00-degi málimet boıynsha 2 393 844 qazaqstandyq bıýlleten aldy, bul daýys berý quqyǵy bar azamattardyń 19,21 paıyzyn qurady.
Saǵat 12:00-de bul kórsetkish 4 677 595 saılaýshyǵa jetip, tizimge engizilgen azamattardyń 37,54 paıyzyn qurady.
Al saǵat 14:00-degi aldyn ala málimetke sáıkes, jańa Konstıtýsııa boıynsha referendým ótti dep tanyldy. Osy ýaqytqa deıin daýys berýge 6 471 378 qazaqstandyq qatysyp, bul tizimdegi azamattardyń 51,93 paıyzyn qurady.
El azamattarynyń 70,98 paıyzy referendýmda daýys berdi
Aıta keteıik, referendým daýys berýge qatysý quqyǵy bar azamattardyń jartysynan astamy qatysqan jaǵdaıda ótti dep esepteledi.
Qazirgi ýaqytta 54 elde ornalasqan 71 referendým ýchaskesi jumys istep tur.