Munaıly óńir ortalyǵynda kóshelerge ornatylǵan kameralar arqyly kólik qozǵalysyna, qoǵamdyq tártiptiń saqtalýyna táýlik boıy baqylaý jasalyp otyr. Oblystyq polısııa departamentiniń bastyǵy Qamza Úmbetqalıevtyń málimetinshe, bıylǵy toǵyz aıda 759 syrtqy baqylaý kamerasymen 186 qylmys ashylypty.
Sondaı-aq jol júrý qaǵıdalaryn buzýshylyqtardy avtomatty túrde tirkeıtin «Sergek» apparattyq-baǵdarlamalyq kesheniniń 1224 kamerasy qala aýmaǵyndaǵy avtokólik joldarynyń 153 jelilik ýchaskelerine jáne 51 retteletin kóshe qıylysyna ornatylǵan. «Sergektiń» beınebaqylaý kameralary arqyly jolda júrý erejeleriniń buzylýy poshta baılanysymen, SMS habarlamasy arqyly kólik ıelerine jetkiziledi. Bıylǵy 10 qyrkúıekte iske qosylǵan qurylǵynyń kómegimen osy kezge deıin 6006 jol júrý qaǵıdalaryn buzǵan quqyqbuzýshylyq anyqtaldy. Quqyq buzýshylarǵa 42 mln teńgeden astam kóleminde aıyppul salynyp, 8 mln 590 myń teńgesi óndirildi.
Jolda júrý erejesin áldeneshe ret buzǵanymen qoımaı, aıyppulyn tólemeıtin júrgizýshiler ustalyp, kólikteri aıyp turaǵyna qoıylyp jatyr. О́ńir polıseıleri 15 qazanda bastalǵan «Boryshker» is-sharasy kezinde osyndaı júrgizýshiniń birine salynǵan aıyppuldyń mólsheri 1 mln teńgeden asyp ketkenin anyqtady.
– Jol qozǵalysy erejelerin buzý, onyń ishinde jyldamdyqty asyrý faktilerine qatysty foto-beınetirkeýdi júzege asyratyn, jalpy avtokólik qozǵalysyn baqylaýǵa alatyn «KORDON M-2», «KORDON M-4» keshenderiniń beınekameralaryna Armenııadan ákelingen «BMW-525» avtokóligi túskenin anyqtady. Kólik júrgizýshisi 55 ret jyldamdyqty asyryp, 1 mıllıon 83 myń 420 teńge kólemindegi aıyppuldy tólemegeni úshin ustaldy. Jyldamdyqty 40 ret údetken «VAZ-21144» kóliginiń júrgizýshisine salynǵan aıyppuldyń mólsheri 666 myń 720 teńgeni quraǵan. Sondaı-aq «VAZ-2108» avtokóliginiń júrgizýshisine 21 márte jyldamdyqty asyrǵany úshin 333 myń 360 teńge aıyppul salynǵan. Al 28 ret jyldamdyǵyn asyrǵan Reseı Federasııasynyń esebinde turǵan «VAZ-21014» kóliginiń júrgizýshisine salynǵan aıyppul 494 myń teńgege jetken, – deıdi oblystyq polısııa departamentiniń baspasóz hatshysy Gúlnazıra Muhtarova.
Patrýldik qyzmet polıseıleri ıeleri aıyppul tólemegen taǵy 37 avtokólikti anyqtap, toqtatty. Ákimshilik quqyqbuzýshylyq týraly kodekstiń 785-babyna sáıkes, boryshker atanǵan júrgizýshilerdiń kólikteri aıyp turaǵyna qoıyldy.
Atyraý oblysy