2016 jyldan beri "1000 oryn – kóshe saýdasy" jobasy aıasynda elordada 1069 jer ýchaskesi bólindi, dep habarlaıdy Egemen.kz
Qol qoıylǵan kelisimsharttarǵa sáıkes 434 saýda pavılony men 117 maýsymdyq nysan ornatyldy. 116 ýchaskede kásipkerlik sýbektileri montajdaý jáne kommýnaldyq qyzmetterge qosylý jumystaryn júrgizýde. Máselen, Almaty aýdanynda 213 jer ýchaskesi, Baıqońyr aýdanynda – 124, Esil aýdanynda – 113, Saryarqa aýdanynda 217 jer ýchaskesi bólingen.
Jer ýchaskeleri halyqtyń áleýmettik osal toptaryna jatatyn kásipkerlik sýbektileri arasynda da bólinedi. 2019 jyldan bastap "Astana" ÁKK AQ 22 jer ýchaskesin berdi.
"Jobany júzege asyrý kezeńinde shaǵyn jáne orta bıznestiń damýynda oń dınamıka baıqaldy. Otbasylyq bıznes uıymdastyryldy, baǵdarlama jumyssyz halyqtyń ózin-ózi jumyspen qamtýyn damytýǵa yqpal etedi. Búginde 1700-den astam jumys orny quryldy, 1,1 mlrd.teńgeden astam jeke ınvestısııa tartyldy. Bul sharalar jergilikti bıýdjetke salyqtyq túsimderdi kóbeıtýge kómektesip, kóshe saýdasynyń ashyqtyǵyn qamtamasyz etedi. Bul máselelerdi retteý bizge kóleńkeli ekonomıkaǵa qarsy turýǵa múmkindik beredi", dedi "Astana" ÁKK AQ "1000 oryn – kóshe saýdasy" baǵdarlamasynyń sektor meńgerýshisi Aıymgúl Kadeshova.
Saýda pavılondary kóbine kókónis, jemister men daıyn ónimderdi (sýsyndar, balmuzdaq, fast-fýd) satý úshin alynady. Bolashaqta shaǵyn jáne orta bıznesti damytyp, jergilikti turǵyndardyń jumyspen qamtylýyn arttyratyn turǵyn aýdandardan jer berýge nazar aýdarý josparlanyp otyr.