Keshe redaksııamyzǵa Pavlodar oblysynyń Qurmetti azamaty Ábilhaq Túgelbaev habarlasyp, súıinshi surady. Osy jyldyń qyrkúıek aıynda «Egemen Qazaqstan» gazeti kótergen másele jartylaı bolsa da sheshimin taýypty. Ol gazet ujymyna, osy iske atsalysqan halyq qalaýlylaryna óńir halqynyń atynan alǵys aıtty.
Esterińizde bolsa, 2020 jyldyń 23 qyrkúıeginde keler jyldan bastap Q.Sátbaev atyndaǵy Ertis-Qaraǵandy kanalynan Shiderti ózeniniń tómengi arnasyna sý jiberý toqtatylýy múmkin ekenin jazǵan edik. Munyń óńirdiń ekologııacy men ekonomıkasyna qanshalyqty zııan ákeletinin de tarqata aıtqanbyz.
Q.Sátbaev atyndaǵy kanaldyń salynýymen Ekibastuz aýyldyq aımaǵynyń aýmaǵyndaǵy Shiderti ózeniniń aǵyny tabıǵı jolmen rettelmeıtin boldy. Osylaısha, Shiderti ózeniniń arnasy Ertis sýyn Qaraǵandy qalasyna qaraı tasymaldaýǵa paıdalanyla bastady. Alaıda munyń zııany da bar edi. Kanal salynǵan soń Shiderti ózeniniń tómengi arnasyna tabıǵı sý jiberilmeıtin boldy. Sóıtip, Aqtoǵaı aýdanynyń jáne Ekibastuz aýyldyq aýmaǵynyń biraz jerine qaýip tóndi. Sol sebepti tabıǵı sý jaıylymynyń óteýi retinde Ertis-Qaraǵandy kanalynan Shiderti ózeniniń tómengi arnasyna kompensasııalyq sý jiberý qarastyryldy. Ár jyldardaǵy kidiristerdi aıtpaǵanda, osy kúnge deıin jyl saıyn 100 mln tekshe metr sý jiberilip keldi. Sonyń nátıjesinde mal sharýashylyǵymen ǵana aınalysatyn eldi mekender berekeli kún keship otyr.
Qyrkúıek aıynda Pavlodar óńiriniń bir top azamaty 2021-2023 jyldarǵa arnalǵan respýblıkalyq bıýdjette kanaldan sý jiberýge qarjy qarastyrylmaǵanyn aıtyp, el gazetinen qoldaý surap edi. 100 mln tekshe metr úshin shamamen 3 mlrd teńgege jýyq qarjy kerek eken. Osy oraıda, Parlament Senaty men Májilisindegi pavlodarlyq depýtattar «Egemen Qazaqstan» gazetine shyqqan maqalanyń negizinde Úkimetke, Qarjy mınıstrligine hat joldap, máseleniń odan ári qaraı sheshilýine yqpal etti.
– 2021 jyly Ertis-Qaraǵandy kanalynan Shiderti ózeniniń tómengi arnasyna 50 mln tekshe metr sý jiberiletin bolypty. Bul – jylda alyp júrgen sýdyń jartysy. Osynyń ózine shúkirshilik etip otyrmyz. Qarjy vıse-mınıstri Tatıana Saveleva 2021 jyldyń alǵashqy toqsanynda bıýdjetti naqtylaý barysynda sýdyń qalǵan kólemine de qarjy qarastyrylýy múmkin ekenin aıtyp, úmit otyn úrlep qoıdy. Osy oraıda máselege aralasyp, yqpal etken el gazeti «Egemen Qazaqstan»-ǵa, Senat depýtattary Altynbek Nýhuly men Nurjan Nursıpatovqa, Májilis depýtattary Nurjan Áshimbetov, Meıram Pishembaev, Aıgúl Nurkına, Aleksandr Sýslovqa, Pavlodar oblysynyń ákimi Ábilqaıyr Sqaqovqa, sondaı-aq osy istiń basy-qasynda júrgen sý sharýashylyǵy salasynyń ardagerleri Alekseı Batalov pen Myrzaǵalı Erǵalıevqa óńir halqynyń atynan rızashylyǵymdy bildiremin, – dedi Ábilhaq Túgelbaev.
Dese de, kanaldan jiberiletin 50 mln tekshe metr eki aýdan úshin áli de azdyq etedi. Bul kólem Ekibastuz aýyldyq aımaǵyn ǵana qamtýǵa jetkilikti. Al Aqtoǵaı aýdanyna sý jetpeı qalý qaýpi bar.
– Sondyqtan qalǵan 50 mln tekshe metr sýdy da alý jaıyn qarastyrý kerek. Jyldaǵydaı 100 mln tekshe metr sý jaıylsa deımiz. Sonda barlyq eldi meken sýdyń yryzdyǵyn kórer edi. Bul ólkege sý jaıylmaǵan jyldarda turǵyndardyń da, tabıǵattyń da qandaı zardap shekkenin jaqsy bilemiz. Úkimet mundaı tabıǵı apatty qoldan jasap, qarap otyrmasyna senemiz, – deıdi sý sharýashylyǵy salasynyń ardageri Myrzaǵalı Erǵalıev.
«Egemen Qazaqstan» bul máseleni nazarda ustaıtyn bolady.