Shekara shebindegi Úrjar aýdanyna qarasty Laıbulaq aýylynyń turǵyndary ınternet pen aýyz sýǵa zárý, dep habarlaıdy Egemen.kz
– Aýyldaǵy aýyz sýymyz lastanyp ketti. Sý ishe almaımyz. Qudyq eki jerde ǵana. Qystyń kúni bitelip, keıde múldem toqtap qalady. Osydan tórt shaqyrym jerde úsh bulaqtyń kózi bar. Aýylǵa sý sol jerden 70 jyl buryn tartylǵan qubyrmen keledi. Qubyrdyń ózi shirip jatyr. Ákimderdiń josparda bar degen sózderinen jalyqtyq, – deıdi aýyl turǵyny Álııa Tájibaeva.
Jospar júzege aspaı jatsa, turǵyndar álbette jalyǵady, shydam da shegine jetedi. Shegine jetken soń shaǵymdanady. Ol zańdy da. Aýyldyqtar túsirip jibergen beınejazbaǵa úńilip kórdik. Sýdyń lastyǵy jaǵa ustatarlyqtaı. Qudyqtyń basyn qańǵyrlatyp, qańyltyrmen jaýyp qoıypty. Aýyl azamattary aıyna eki ret baryp, bulaq kózin tazalap otyrady. Qaraýsyz qalsa, qoqysqa tolyp ketedi eken. Qoqysy bylaı tursyn, sýdyń ishinde qurt-qumyrsqa, tyshqanǵa deıin júretin sekildi. Amal qansha, laıbulaqtyqtar osy sýdy iship otyr. Sýdyń dámi bar ma desek, "siz suramańyz, biz aıtpaıyq" dep qysqa qaıyrdy.
– Internet te joq, keıbir jerde ǵana ustaıdy. Ol da qashyqtyqtan oqyp jatqan stýdentterge qıyndyq týǵyzyp tur. Sonyń saldarynan 15 shaqty bala ketip qaldy, – desedi aýyl halqy.
Shekara shebindegi aýyldar zaman aǵymynan qalys qalyp, qarapaıym qara sýǵa jarymaı jatqan soń kóshpeı qaıtsin?! Kóshedi. Kóshken soń shekaradaǵy aýyldar qańyrap bos qaldy dep baıbalam salamyz. Ondaıda atam qazaq "jaý ketken soń qylyshyńdy tasqa shap" deıtin. Qala ómirine sińip ketken halyqty qaıtip aýylǵa aparý eki talaı. Sol úshin de aýyldaǵy turǵylyqty halyqqa nege búgin jaǵdaı jasamasqa?!
Shyr-pyr bolǵan turǵyndardyń aryz-shaǵymyn aıtyp, Altynshoqy aýyldyq okrýginiń ákimine habarlastyq. Altynshoqy okrýgine, Laıbulaqpen qatar Aıtpaı, Tekebulaq aýyldary da qaraıdy. Laıbulaq aýylynda 398 adam turady eken.
– Aýyz sý máselesi bar. 368 mln 456 myń teńgeniń jobalyq-smetalyq qujaty ekspertızadan ótken. Endi respýblıkalyq deńgeıdegi saraptama jasalǵan soń Úrjar aýdanynyń keshendi jospary boıynsha, Laıbulaq aýyly men Barqytbel aýylyna birinshi kezekte sý tartylady. Bári durys bolsa, jumys 2021 jyly aqpanda bastalady, – dep qýantty okrýg ákimi Erkin Saılaýbekuly.
Al ınternet jelisin tartý jóninde ústi-ústine hat jazylyp jatqanymen, nátıje jaqyn kúnderi bola qoımaıtyn sııaqty.