Qyzylordada adamdy tirideı órtep óltirgen úsh qylmyskerge úkim shyqty. Bul oqıǵa týraly oblystyq prokýratýra basqarmasynyń aǵa prokýrory, kishi ádilet keńesshisi Ermek Qutybaev aıtyp berdi.
Qyzylordada adamdy tirideı órtep óltirgen úsh qylmyskerge úkim shyqty. Bul oqıǵa týraly oblystyq prokýratýra basqarmasynyń aǵa prokýrory, kishi ádilet keńesshisi Ermek Qutybaev aıtyp berdi.
«Ústimizdegi jylǵy 16 mamyr kúni saǵat 12-de Qarmaqshy aýdanynyń ortalyǵy – Josaly kentinde jeke taksıshi E.Esetov jolaýshy S.Júsipovti mejelegen jerine aparyp tastaıdy. Biraq jolaı tanysyp alǵan ekeý toqtaǵan soń birge araq ishýge kelisedi. Sosyn jolaýshy jigit satyp ákelgen bir bótelkeni ekeýi qyldaı bólip iship alady. Osydan keıin qyzyp alǵan eki jigit ishýdi jalǵastyrmaq bolady. Sóıtip, taksıshi óziniń S.Sháıkenov jáne B.Qýańbaev degen taǵy eki joldasyn kólikke mingizedi», – dedi ol.
Aqyrynda ortalary tórteýge tolǵan jigitter kenttegi bir baý-baqshanyń ishine baryp, ashy sýdy taǵy shaıqap ishedi. Sol jerde keıin kelgenderdiń biri – S.Sháıkenov pen S.Júsipovtiń arasynda janjal týady. Kıkiljiń kóliktegi magnıtofondy óshirip kelýden bastalady. Sol jumys úshin bular S.Júsipovti jumsaıdy. Al ol buǵan: «Munda menen de kishiler otyr ǵoı», dep qarsylyq kórsetedi. Onyń munysy E.Esetovke de unamaıdy. Jurtty ıirip otyrǵan S.Sháıkenovke jaǵympazdanǵan ol kútpegen jerden óziniń jolaýshysyn baspen uryp qulatady. Sol-aq eken, bir-birlerin burynnan jaqsy biletin úsh jigit sońǵy tanystaryn jabylyp uryp tastaıdy. Ony urý birneshe kezekke jalǵasady. Sońynan sol mańda júrgen bireýlerdiń aıqaı salýymen bular shalajansar jatqan jigitti kóliktiń artqy oryndyǵyna salyp alyp, kenttiń syrtyna aparyp tastaıdy.
Biraq aýdan ortalyǵyna qaıta oralǵan soń olar aqyldasa kelip, taıaq jegen kýáni tiri qaldyrmaýǵa kelisim jasaıdy. Sóıtip, úsh jendet jaraly jigit qalǵan jerge qaıta baryp, ony óltirýge kirisedi. Bul úshin olar marqumǵa úsh ret pyshaq salady da, esinen tanyp jatqan onyń ústine ot qoıady…
Osy qylmystary úshin qylmyskerler 18 jyldan bas bostandyqtarynan aıyryldy. Olar bul jazany qatań rejimdegi túzeý kolonııasynda ótkizedi.
Qurysh NURYMBET.