Burynda da dáriger qadirli mamandyqtyń biri edi. Al jahandy jaılaǵan koronavırýs ınfeksııasymen kúreste adam janyna arasha bolýdy tańdaǵan jandardyń qadiri tipten arta tústi. Aryna da, aq halatyna da qylaýdaı daq túsirmegen dárigerler halyqtyń densaýlyǵyn saqtaý úshin otbasyna barmaı, qaýipti indetpen kúrestiń bel ortasynda júrdi. Jaqynda ómir men ólim úshin arpalysqan naýqastarǵa jan jylýyn aıamaı, jyly sózimen de, shıpaly emimen de dem bergen 70 qyzmetkerge «Halyq alǵysy» medali berildi.
Oblys ákiminiń orynbasary Baqytgúl Hamenovanyń aıtýynsha, óńirde 7 995 medısına qyzmetkeri jumys isteıdi. Sonyń ishinen koronavırýs ınfeksııasymen kúreske 2 480 qyzmetker jumyldyryldy. Olardyń arasynda qaýipti indetti juqtyryp, tipti qaıtys bolǵany bar.
– Bul indet tutas álem úshin de, Qazaqstan úshin de úlken synaqqa aınaldy. Sol synaqta medısına salasynyń, Qarýly Kúshter, polısııa qyzmetkerleriniń, eriktilerdiń erlikke bergisiz kúndelikti isine el kýá boldy. Ásirese dárigerlerdiń ólsheýsiz eńbegi bar. Olar syrqattardy emdeýmen shektelip qana qoımaı, vırýstyń keń taramaýy úshin aıanbaı eńbek etti, – deıdi oblys ákiminiń orynbasary.
«Halyq alǵysy» medalin qaýipti indettiń birinshi tolqynynda aldyńǵy shepte jumys istep, ınfeksııadan kóz jumǵan medısına qyzmetkerlerine de berý uıǵarylǵan eken. О́ıtkeni ómirden ótken dárigerlerdiń eńbegin el bilýi tıis. Ýaqytpen sanaspaı, ár naýqastyń ómiri úshin kúresken joǵary bilimdi dárigerdiń biri – Narıman Aqpanov. Atyraýdaǵy epıdemııalyq ahýal ýshyqqan tusta rentgolog vırýs juqtyrǵandardy rentgenge túsirgen. Alaıda dárigerdiń ózi koronavırýs ınfeksııasyn juqtyryp, tóteleı kelgen tajaldyń qaqpanyna qutyla alǵan joq. Sol sebepten «Halyq alǵysy» medali marqumnyń áıeli Darıǵa Múslimovaǵa tabystaldy.
Al Zemfıra Erbolatqyzy qaýipti indetke shaldyqqandardyń basym bóligi emdelgen №2 oblystyq aýrýhanada jumys isteıdi. Orta býyn qyzmetkeri áriptesteri sekildi úsh aı boıy otbasyna barmaı, indet oshaǵynda boldy. Sóıtip, ózi tańdaǵan mamandyǵyna adaldyǵyn tanytyp, halyqtyń densaýlyǵyn qorǵaý jolyndaǵy mindetin minsiz atqardy. Qaýipti ınfeksııa saldarynan qos ókpesi qysylyp, dem jetpegenderge ottegi apparatyn qosyp, myńdaǵan naýqastyń ómirin arashalap qalǵanyn maqtan tutady.
Atyraý oblysy