Kún salqyndap, ettiń baǵasy ósken saıyn, bazardaǵy maldyń da quny qymbattaıdy. О́kinishke qaraı jazdyń sońy men kúz aıynda sharýa qojalyqtary men aýyl adamdarynyń óristegi malyn urlap ketetin oqıǵalar jıi oryn alady.
Aqtóbe oblystyq Polısııa departamentiniń basshysy Atyǵaı Arystanovtyń málimdeýinshe, bıylǵy jyldyń on aıynda 100 mal urlyǵy tirkelgen. Bul byltyrǵy jylmen salystyrǵanda, 41,4 %-ǵa azaısa da, ortasha eseppen Aqtóbe oblysynyń ár aýdanynda jylyna 8-9 mal urlyǵy tirkelgenin kórsetedi. Salystyra ketsek, ótken jyly oblys aýmaǵynda 170 mal urlyǵy tirkelgenimen, osy qylmystardyń qanshasynyń ashylyp, qansha istiń sotqa jiberilgeni týraly naqty málimet joq.
О́ńirde mal urlyǵynyń byltyrǵy jylmen salystyrǵanda edáýir tómendeýine ýchaskelik polıseılerdiń ózderine bekitilgen aýmaqta turǵyn úıler men sharýa qojalyqtaryn aralap, ashyq sóılesýi sebepshi boldy. Osy jaǵdaı aýyldaǵy jasyryn urylardy da azdap seskendirgen sııaqty. Ýchaskelik polıseıler maldy óriske baqylaýsyz jiberýdi toqtatyp, kezekpen baǵýdy uıymdastyryp, ne baqtashy jaldaýdy qaıta-qaıta eskertip júr.
Bıyl mal urlyǵy eń az tirkelgen aýdandardyń qatarynda – Yrǵyz aýdany tur. Qańtar-qazan aıy aralyǵynda Yrǵyz aýdandyq polısııa bóliminde mal urlyǵyna baılanysty 4 derek tirkelip, 2 qylmys ashylǵan. Malym joǵaldy dep aryzdanǵan aýdan turǵynynyń óristen joǵalǵan maly bir saıdan tabylyp, ol aryzyn qaıtaryp alǵan. Biraq áli kúnge deıin bir qylmys ashylmaı tur.
Aýdan polıseıleriniń habarlaýynsha, maldyń qoldy bolýyna kóp jaǵdaıda ıeleri kináli. Sıyr, jylqylaryn kúnde túgendemeıdi, ózderi 8-10 kún izdep, taba almaǵan soń baryp qana polısııaǵa aryz beredi. «Myna tóbeniń tusynda júrgen shyǵar» dep aptalap izdep júrgende, ury da izin sýytyp úlgeredi. Ýchaskelik polıseıler turǵyndardan óz maldaryna qyraǵylyq tanytyp, en-tańbalaryn saldyryp, ásirese, jylqylardy qujattandyrýdy suraıdy. Mal qamaıtyn qoralardy jaqsylap bekitip, qulyp ornatý kerek. Aýyl adamdary maldy uzaq ýaqytqa qaraýsyz qaldyrmaı, kórshilermen birlesip maldyń kezegin uıymdastyrý kerek dep esepteıdi. Qoradaǵy mal túnde qoldy bolǵan jaǵdaıda polısııa qyzmetkerlerine, ne ýchaskelik polıseıge dereý habarlasyp, qylmys izderine qol tıgizbeý kerek dep eskertedi. Sonyń ishinde qoranyń qulpyn buzǵan jerdegi aıaq kıim izine, qylmys quralyna, shına protektorynyń izderine, maldy jetektep áketken izderge tımeý qajet. Bul – urylardy ustaýdyń eń birinshi aıǵaǵy.