Kólik rýline otyrsa, «qanatyna» jel bitip, jelik qýatyn júrgizýshiler jol erejesin óreskel buzady. Biraq ákimshilik aıyppulyn tóleýge jelkesi jar bermeıtinin qaıtersiz. «Boryshker» jedel-profılaktıkalyq is-sharasy kezinde 192 júrgizýshi 14 mln teńge aıyppul tólemegeni belgili boldy.
– Basty maqsat – jolda júrý erejelerin buzǵany úshin salynǵan aıyppulyn tólemeı júrgen júrgizýshilerdi anyqtaý. Patrýldik polısııa qyzmetkerlerimen tek bir táýlik ishinde aıyppulyn tólegen segiz júrgizýshi anyqtalyp, kólikteri arnaıy turaqqa qoıyldy. Máselen, S.Datov kóshesinde reseılik nómiri bar «Audi A6» avtokóligi toqtatyldy. Tekserý kezinde kólik ıesiniń 500 040 teńgeni quraǵan aıyppulyn tólemegeni anyqtalyp, avtokólik aıyp turaǵyna jetkizildi. Is-shara kezinde 192 kólik ıesiniń 14 mln teńge kólemindegi aıyppuldy tólemegeni anyqtalyp, avtokólikteri aıyp turaǵyna qoıyldy, – dep málim etti oblystyq polısııa departamentiniń baspasóz qyzmeti.
Aıyppul tólemeıtin júrgizýshilerdiń deni – ózge elden kólik alyp kelgender. Solardyń qatarynda Reseıde tirkelgen kólikterdi ákelgen 135 júrgizýshi bar. Biraz daý-damaıdyń týyndaýyna sebepker bolǵan Armenııa Respýblıkasynyń kóligimen júrgen 18 júrgizýshi de aıyppulyn tóleýge asyqpaı júr.
Polısııa qyzmetkerleri zańsyzdyqtyń aldyn alý úshin qyraǵylyq tanytqan saıyn jol erejesin buzýǵa beıim júrgizýshiler kóbeıip barady. Máselen, Atyraý qalasynda 2-8 qarashada patrýldik polıseıler 1001 ret jolda júrý erejesin buzǵandardy anyqtap otyr. Departamenttiń baspasóz qyzmeti usynǵan málimetke qaraǵanda, kólik quralyn mas kúıinde basqarǵan 13 júrgizýshi (Ákimshilik quqyqbuzýshylyq týraly kodekstiń 608-baby), joldyń qarsy baǵytyna shyqqan – 7 (596-baptyń 3-bólimi), mindetti saqtandyrý shartyn jasasýdan jaltarǵandar – 162 (230-baptyń 2-bólimi), júrgizý quqyǵynan aıyrylǵan 2 (612-baptyń 3-bólimi) júrgizýshi anyqtalyp, ákimshilik jaýapkershilikke tartyldy. Bir aptada quqyqbuzýshylyq jasaǵany úshin salynǵan aıyppul arqalaǵan 72 júrgizýshi de tártip saqshylarynyń nazaryna ilikti.
Sondaı-aq Reseıde tirkelgen 44, Armenııada esepte turatyn 5 kólik quraly arnaıy turaqqa qoıylǵan. Al 23 avtokólik ıesinen 922 296 teńge kóleminde aıyppul óndirilgen. Ákimshilik aıyppulyn tólemeı júrgenderdiń basym bóligi shetelde tirkelgen avtokólikterdiń júrgizýshileri bolyp shyqty.
Tipti kóligine jasandy nómir taǵýdy sán kóretinder bar. Patrýldik polısııa qyzmetkerleri memlekettik belgisi kúdik týdyrǵan «Toyota Avalon» avtokóligin 10 qarashada saǵat 03:00 shamasynda toqtatty. Tekserý kezinde kólikke taǵylǵan memlekettik belgilerdiń jasandy ekeni anyqtaldy. Sheteldik kólikti tizgindegen 23 jastaǵy júrgizýshiniń medısınalyq kýálandyrý qorytyndysymen orta deńgeıdegi mas kúıde bolǵany dáleldendi. Bul azamatqa qatysty Ákimshilik quqyqbuzýshylyq týraly kodekstiń 590-babynyń 4-bólimimen (Jalǵan nemese jasandy memlekettik belgi ornatqan kólik quralyn basqarý) jáne 608-baby 1-bólimine sáıkes jınaqtalǵan qujattar Atyraý qalalyq mamandandyrylǵan ákimshilik sotyna joldandy. Sot qaýlysymen mas júrgizýshi jeti jyl merzimge kólik quralyn júrgizý quqyǵynan aıyrylyp, 15 táýlikke ákimshilik qamaýǵa alyndy.
Bir kólikke bir nómir bolýshy edi. Al eki túrli nómir taǵýǵa bola ma? Atyraýlyq júrgizýshi dál osyndaı áreketimen polısııa qyzmetkerlerin aldaǵysy kelgen sekildi. Bálkim, jol erejesin buzǵanyn jasyrýdyń amaly shyǵar. Degenmen qyraǵy kózdi patrýldik polıseıler «VAZ-2114» avtokóligin basqarǵan júrgizýshiniń «erkeligine» toqtam saldy. Tekserý kezinde Reseı Federasııasynda tirkelgen jeńil kóliktiń aldyńǵy jaǵyna taǵylǵan memlekettik belginiń áriptik sımvoldary ózgertilgen eken. Kólik quraly arnaýly aıyp turaǵyna qoıyldy. Al 38 jastaǵy júrgizýshiniń mundaı áreketke nege barǵany ázirge belgisiz. Endi polıseıler onyń bul áreketinen qylmystyq quqyqbuzýshylyq belgilerin anyqtaý úshin tekserý júrgizip jatyr.
Atyraý oblysy