Qazir adamdardy aldap, senimine kirip, onyń múlkine qol suǵyp, ıemdenip alaıaqtyq jasaıtyndar qatary kóbeıýde. Máselen, 10 aıda Qyzylorda oblysynda osyndaı 511 qylmys tirkelip, onyń 490-y nemese 96 paıyzy ashylǵan. Bul týraly búgin óńirlik kommýnıkasııalar qyzmetinde oblystyq PD bastyǵynyń birinshi orynbasary, polısııa polkovnıgi Shamshıdın Ámıtovtiń qatysýymen ótken brıfıngte aıtyldy.
Qylmyskerler negizinen páter, jer ýchaskesin, jeńildetilgen nesıe alyp berýge, jumysqa ornalastyrýǵa ýáde berip, ózine sengen jurtty jer sıpatyp ketedi. Sońǵy kezde aqparattyq tehnologııalardyń damýyna baılanysty, atalǵan qylmystardyń kóbi ınternet arqyly jasalatyny baıqalady. Sondyqtan, polısııa qyzmetkerleri jeńil tabys tabýǵa ýáde bergen adamdar jolyǵa qalǵanda eń aldymen zań qyzmetkerlerinen qajetti keńester alyp, saqtyq sharalaryna erekshe nazar aýdarýdy suraıdy.
Esepti merzimde kámeletke tolmaǵandarǵa qatysty 19 qylmys tirkelgen. Balalar jasaıtyn qylmysty tek polısııa kúshimen tyıý múmkin emes. Sol sebepti quqyq qorǵaýshylar ata-analarmen, basqa da qoǵamdyq emes uıymdarmen birigip jumys jasaýǵa basa mán berip otyr. Qazaqstan Respýblıkasy ÁQBtK-niń 442-babynyń talaptaryna sáıkes 2528 ata-ana jaýapqa tartyldy.
On aıda oblysta 345 jol kólik oqıǵasy kezinde 68 adam qaıtys bolsa, 401-i dene jaraqatyn alǵan. Jol kólik oqıǵalarynyń basty sebepteriniń biri jolda júrý erejeleriniń óreskel buzylýy. Kólikti mas kúıde basqarǵan 902 júrgizýshi anyqtalyp, barlyǵy ákimshilik qamaqqa alyndy. 785-i kólik quralyn basqarý quqyǵynan aıyryldy.