Áleýmettik jelide taraǵan "Batys Qazaqstan oblysynyń Tasqala aýdanynda quldyqta bolyp, qashyp shyqtym" degen qyrǵyz azamatynyń aýdıojazbasy BQO Polısııa Departamentin aıaǵynan tik turǵyzdy, dep habarlaıdy Egemen.kz.
"Qyrǵyzstan azamaty halyqaralyq janjal týdyra jazdady. Ol tirkeý merzimi taýsylýyna baılanysty deportasııalanýdan qorqyp, osyndaı áreketke barǵan. Ol ózin "Batys Qazaqstan oblysynyń bir aýylynda meni kúshpen ustap, qul retinde paıdalandy" dep málimdegen", deıdi Batys Qazaqstan oblystyq Polısııa Departamenti taratqan baspasóz málimdemesinde.
WhatsApp jelisi arqyly taraǵan aýdıojazbada: "Assalaýmaǵalaıkým, Qyrǵyz elim! Meniń aty-jónim Azatbek Amırov, men Ýralsk degen shaardan qachyp keleatamyn. Ýralsk degen shaar, raıon Tasqala, aıyldyń eski aty Vavılnyı, jańa aty – Bastaý. Oshýl jerde qazaqtyń qolynda qul bolyp toǵyz aı ichtedim. Ázir qachyp ketip baratamyn. Qyzy arqyly qachyp chyqtym. Any sol jerde ózimizdiń taǵy 4 qyrǵyzymyz qaldy. Eń chońy – Temir degen kisi, jasy altmyshtarǵa baryp qalǵan. Qarasýdyń Keńsaı aıylynan bolady. Ekinchisi de sol Qarasýdyń Keńsaıynan. Tórt qyrǵyz jaran qaldy. Eki bala Birinchi maı degen aıyldan bolady. Aty-jóni – Emıl, Qanybek. Qyrǵyz eli, shyǵaryp keteli, qalyp ketti baldar 8 jyldan beri qulshylyqta júrgen", deıdi er adam daýysy.
Bul aqparat Tasqala aýdandyq polısııa bólimine 14 qarashada belgili bolǵan. Sol mezette oblystyq polısııa departamentinen arnaıy jedel top qurylyp, aıtylǵan jerge attanǵan. Alaıda dabyl jalǵan bolyp shyqqan. Kúshtep ustalǵan shetel azamattary tabylmaǵan.
– 1982 jyly týǵan Qyrǵyzstan azamatynyń aýdıojazbasy tekserildi. Atalǵan jerdegi sharýa qojalyǵynyń birinde ol azamattyń jumys istegen ras eken. Biraq ol jalǵyz bolǵan. Aýylda basqa shetel azamaty bolmaǵanyn jergilikti halyq ta rastaıdy. Aýylda ol azamat erkin júrgen. Jaz boıy bolǵan azamat qarasha aıynyń basynda Almaty qalasy arqyly óz eline attanǵan. Sharýa qojalyǵy basshysy oǵan eńbekaqy jáne jol shyǵyny úshin 100 myń teńge bergen. Tekserý kezinde qyrǵyz azamatynyń tirkeý merzimi aıaqtalǵany, sondyqtan kúshtep departasııaǵa ushyramas úshin osyndaı ótirik qurastyrǵany belgili boldy, - deıdi Batys Qazaqstan oblystyq Polısııa departamentiniń resmı ókili Bolatbek Belgibekov.
Polısııa ókiliniń aıtýynsha, Batys Qazaqstan oblysynda shalǵaıdaǵy eldi mekender men sharýa qojalyqtarynda eńbek mıgranttaryn zańsyz ustaý faktileri únemi tekserilip otyrady.
Bizge belgilisi, Azatbek Amırov 15 qarasha kúni Qyrǵyzstan Respýblıkasynyń konsýly bergen anyqtama arqyly memlekettik shekaradan ótip, óz eline jetken.
Aýdıojazbada aıtylǵan Dostyq aýyldyq okrýginiń ákimi Hafız Maratulyna telefonmen habarlastyq.
- Iá, osy oqıǵa boıynsha kóshi-qon polısııasynyń ókilderi kelip, aýylda arnaıy tekseris júrgizdi. Aıtylǵan sózder dáleldenbedi. Bastaý aýyly – shaǵyn ǵana eldimeken, 26 úıdiń 16-synda ǵana turǵyn bar. Okrýg ortalyǵynan 7 shaqyrym jerde ornalasqan, bastaýysh mektebinde 7 bala oqıdy. Aýylda bir mal ósiretin sharýa qojalyǵy, kartop egýmen aınalysqan «Isaǵalıev» jeke kásipkerligi bar. Sáýir aıynda qyrǵyz azamaty kelgeni ras, jaz boıy Erlan Isaǵalıevtiń kartop alqabyna kómektesken. Bul ózi 1 gektarǵa jetpeıtin shaǵyn egistik. Qazaqy aýylda bireý bireýden eshteńe jasyra almaıdy ǵoı. Shetel azamattary kúshpen ustalyp, qul bolyp jatyr degen jalǵan sóz. О́ıtkeni ózim de osy aýylda týyp-óstim. Qazir saılaýdyń qarsańy, saılaýshylar tizimin tekserý, turǵylyqty jerin anyqtaý júrip jatyr. Mysaly, Bastaý aýylynda 31 saılaýshy bar. Qyrǵyz azamatynyń nege bulaı eldi dúrliktirgenin bilmeımin. Múmkin jalaqyǵa narazy boldy ma eken? Bul máseleni jeke kásipkerge jolyǵyp, ózim de anyqtap kórmekpin, - deıdi Hafız Maratuly.
P.S. Batys Qazaqstan oblystyq Polısııa Departamenti taratqan aqparatqa qaraǵanda, bıylǵy mamyr-qyrkúıek aılary aralyǵynda Syrym aýdanyndaǵy sharýa qojalyqtarynyń birinde 1963 jyly týǵan azamat erkinen tys zańsyz ustalǵan. Osyǵan sáıkes polısııa qyzmetkerleri Qylmystyq Kodekstiń 126-baby 1-tarmaǵy boıynsha tergeý júrgizýde.
Batys Qazaqstan